"Loloos ne'e halo tiha ona iha tinan kotuk (2020), ho tinan ida ne'e (2021), maibé to'o agora señor ministru iha fali ona ninia skips hodi dehan filafali katak rekrutamentu seidauk bele halo, maibé halo fali iha tinan oin (2022), ne'e hanesan de'it, subar-an nafatin de'it, hodi lakohi hola responsabilidade, hodi foti desizaun ba vida nasaun ninian, no vida profesór sira nian”, dehan nia iha PN, segunda (29/11).
Iha ne'e, Deputadu PD mós hanesan eis Ministru Edukasaun, komu iha tempu ne'eba asume kargu tinan rua de'it, la konsege atu halo polítika ida ne'e.
Maibé altura ne'e Eis Ministru Edukasaun, António da Conseição ‘Kalohan’ konsege identifika númeru profesór kontratadu barak tebe-tebes, no obra ida ne'e laiha kontinuasaun husi governasaun atual sira.
"Oitavu Governu, la hanoin atu fó kontinuidade atu oinsá mak rezolve profesór kontratadu sira-nian, tanba ne'e mosu filafali ami ida dispensa tiha ema lubuk ida mais agora hanoin atu rekruta filafali 975 profesór ne'ebé mak señor doutor Armindo Maia agora dadauk planea atu halo”, hatete nia.
Iha tinan 2020, Ministru Edukasaun Juventude no Desportu (MEJD) rasik deklara atu rekruta profesór hamutuk 975 iha tinan 2021 hodi hanorin iha eskola ensinu báziku to’o sekundária jerál nomós tékniku vokasionál.
Nune'e prosesu rekrutamentu ne'e rasik dehan sei fó prioridade liubá profesór voluntáriu, kazuál no kontratadu purvolta 5.203 ne’ebé hanorin ona komesa iha tinan 2013 to’o agora, maibé realidade prosesu refere muda fali ba tinan 2022.
Entretantu, Orsamentu Jerál Estadu (OJE) tinan 2021 ne’ebé prevee ba MEJD hamutuk millaun US$111,5.
Husi totál orsamentu ne’e, aloka millaun US$61,6 aloka ba saláriu vensimentu, millaun US$16,6 ba bens servisu, millaun US$2,9 ba kapitál menór, millaun US$7 ba kapitál dezenvolvimentu no millaun US$23,1 ba transferénsia públika.
Purtantu alokasaun OJE ba Ministériu Edukasaun Juventude no Desportu (MEJD) iha tinan 2020, hamutuk millaun US$68.332,420.
Husi totál ne’e fahe ba kategória saláriu vensimentu US$59,341,349, bens no servisu US$7.611,967, Kapitál Menór US$283,500 no Transferénsia Públika U$1.095,604. (*)
