Xefe Suku Bekora, António da Silva Soares deklara, nu’udar autoridade sente kontente no konkorda ho desizaun husi komandu nian, ne’ebé mak ko’alia liuhusi diálogu ho estudante sira iha ESJ 12 novembru Bekora.
"Ha’u kontente ho Komandante operasaun ne’ebé reprezenta komandante Munisípiu Dili mai iha ne'e ohin hatete katak aban ba oin, ami sei hala'o kontrolu ho polísia, para se mak hatais farda eskola labele tur arbiru iha liur”, dehan nia ba www.tempotimor.com iha ESJ 12 novembru, segunda (29/11).
Desizaun ne'e, Komandu PNTL Munisípiu Dili foti liuhusi diálogu ho estudante sira husi ESJ 12 novembru no 5 de maio, ne’ebé mak hetan akompaña husi Administradór Postu Kristu Rei, Xefe Suku Bekora no Xefe Aldeia, nomós Komisaun Reguladór Arte Marsiál (KRAM), Konsellu Konservasaun Juventude Timor iha resintu 12 novembru.
Durante diálogu, parte Polísia mós fó atensaun no alerta nafatin ba estudantr atu labele tur arbiru iha liur durante oras eskola nian.
Tanba hanesan públiku tomak hatene konfrontu entre estudante sira husi ESJ 12 novembru no 5 de maio, ida ne'e sei hafoer naran eskola.
"Ami la'ós atu halo diálogu la'e, ami mai atu hanorin labarik sira para evita problema sira ne'e. Tanba agora sira eskola mak sira tuda malu ne'e aban bainrua sira atu ba ne'ebé, lori Timor ba oin la'e, lori Timor ba fali kotuk, tanba futuru mak labarik sira agora ne'e”, dehan nia.
Husu ba estudante sira atu haree ba oin, lalika haree fali ba kotuk, tanba uluk ema sira nakar tuda malu ne'e tanba kontra Indonézia no la'ós hanesan tempu agora, timoroan mak tuda malu ne'e laloos.
"Tur arbiru iha liur, ami sei kaer sira, hothotu tama eskola para labele ataka malu, tuda malu iha ne'eba, tanba se la’e, sira ba tiha tur iha liur ne'eba, tuda malu iha ne'eba depois sira halai tama mai eskola, orsida halo eskola naran dois”, hatete nia.
Entretantu, konfrontu (tuda-malu) entre estudante sira husi Eskola Sekundária Jerál (ESJ) 12 Novembru ho 5 de maio, loron sábadu (27/11), tuku 10:00, iha suku Bekora, konsege rezulta profesór no estudante na'in-ida hetan kanek kaman.
Iha akontesimentu refere, Polísia Nasional Timor-Leste (PNTL) eskuadra Kristu Rei nian, ne’ebé lidera husi Komandante Alex Samurai, tun ba hakalma situsaun no konsege kaptura mós autór balun iha terenu. (*)