Tanba ne’e, Reprezentante família Bualale, husi Postu Administrativu Kelikai, Munisípiu Baukau ne’e, hamulak ona iha fatin lakon Komadante Daitula iha Lie Gali Gau.
Lia-na’in, Cirilio dos Reis da Costa hatete, atividade hamulak ne'e, tanba komadante Daitula hanesan sumbriña importante ba nasaun Timor-Leste hahú halo funu husi ai-laran tama to'o vila, maibé lakon derepente iha odamatan ukun-an nian.
"Ami tunu manu ne'e haruka tuir, keta halo iha ema ruma mak rai ódiu hatudu matan no liman karik husu husi manu nia aten nomós aman maromak", dehan lia-na’in Cirilio, iha reflesaun fatin Daitula lakon, Gali Gau, sábadu (27/11).
Lia-na’in ne’e, sente triste tanba lakon komandante funu na'in di'ak ida ne'ebé mak ka'er kilat hamrik metin hodi defende povu no rai doben Timor-Leste, maibé lakon derepente de'it iha povu nia klaran.
"Funu atu hotu, derepente lakon fali ne'e mak ami-nia fuan moras, hamulak ami kontinua hamulak, tanba funu na’in", afirma nia.
Iha mós objetivu seluk husi hamulak ne'e, entrega tomak ba natureza Timor nian hodi hateke no haree tuir, husi nia feen, nia oan, to'o jerasaun hitu. (*)