"Aprova ona akordu ba projetu entre Timor-Leste no Ajénsia Kooperasaun Internasionál Koreia nian (KOIKA) ba dijitalizasaun Sentru Nasionál Chega no autoriza Ministru finansas, Rui Augusto Gomes, atu asina”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (17/11).

Tuir akordu ne'e, KOIKA sei hala'o kontribuisaun finananseira, ho valor dólar amerikanu millaun lima atu hari’i sistema jestaun sustentável ida ba Sentru Nasionál Chega nian.

Projetu ne'e ho atu hadi'a sistema prezervasaun arkivu no jestaun sentru nian, hodi estabelese Sentru Nasionál ida ba Edukasaun ho kualidade kona-ba istória no dame, sei dezenvolve modulu formasaun sira ba manorin sira istória nian.

"Hakarak mós atu hametin kapasidade no parseria nasionál no rejionál sira ba rekonsiliasaun konflitu, hari’i dame no hari’i Estadu ba dezenvolvimentu sustentavel, liuhusi organizasaun sorumutuk nasionál no internasionál ba rekonsiliasaun no hari’i dame”, esplika nia. (*)