Tempotimor (Díli) – Governu Timor-Leste no Governu Portugal asina tan memorandum of understanding (MoU) iha area edukasaun hodi eleva diak liután kualidade no profesionalizmu profesores sira nian.

Iha serimonia asina MoU ne'e, Prezidente Institutu Camoes, I.P. Luis Fero Lemos katak projetu pro-Portugues nu'udar parseria ne'ebé Governu Timor-Leste no Governu Portugal halo.

"Projeitu ne'e, involve mós substansia barak liuliu Ministeriu Edukasaun Timor-Leste nian, inklui mós sira seluk ne'ebé iha doadores hamutuk na'in neenulu resin. No projetu ne'ebé  nia estimasaun ba tinan haat nia laran," dehan Prezidente Institutu Camoes, I.P. Luis Fero Lemos  iha salaun Ian Martin Infordepe, Kinta (05/09/19).

Iha fatin hanesan, Ministra Edukasaun, Juventude no Desportu, Dulce de Jesus Soares katak, projetu ne'e nu'udar projetu ida ne'ebé sei fó formasaun ba profesores sira iha novel A1 no B2.

"Projetu ida ne'e, ita sei fó formasaun ba profesores sira iha nivel A1 kuaze rihun neen resin, no A2 iha rihun ualu resin, inklui nivel B2 rihun sia resin," dehan MEJD.

Ministra mós akresenta, projeitu ne'e sei abranze ba munisípiu, liuliu iha area remotas liu. Tanba Governu preve osan ba projetu ne'e kuaze milioens US$ 14. Inklui mós Governu Portugal sei tau osan mós hodi projetu ne'e la'o durante tinan tolu nia laran.

MEJD fiar katak liuhosi projetu ne'e bele kapasita profesor sira hodi hasa'e kapasidade iha lian Portuges. Tanba ne'e, projetu dahuluk ne'ebé mak foka liu ba lian Portuges.