Mate Isin Saudozu sai husi uma kuaze tuku 10:00 oras timor-leste, ba Kuartel Jenerál F-FDTL, Fatuhada, hafoin liuhusi matebian nia rezidénsia iha Kolmera no kontinua ba Sentru Formasaun Metinaro.

Iha serimónia misa ne’e marka prezensa husi Xefe Eatadu Maior Jenerál, Tenente Jenerál Lere Anan Timur hamutuk ho ofisiál sira iha militar inklui soldadu no família matebian sira.

Bainhira to’o iha Metinaro hodi kontinua lori ba Saudozu nia moris fatin Suku Mehara, Postu Administrativu Tutuala, Munisípiu Lautein, atu halo prosesu funerál tuir kultura hafoin lpro ba halot iha Jadin Erói Lospalos, Munisípiu Lautein.

Gabinete Forsa 2020 Falintil-Forsa Defeza Timor-Leste (F-FDTL), Capitão Mar de Gerra, Higinio das Neves afirma, Tanente-koronel Domingos da Costa dos Santos “Domin”, hakotu iis tanba sofre moras komplikadu.

“Nia uluk halo tratamentu iha Portugál, tanba moras  fuan, tensaun, no iis boot, entaun foin dadaun, ita enfrenta hela situsaun Covid-19 ne'ebé nia ladun fó atensaun ba moras entaun moras ne'e komesa fali to’o ohin nia hakotu iis, iha ICU HNGV”, dehan Kapitão Mar de Gerra Higinio  das Neves, iha HNGV, sábadu (13/11).

Matebian Tenente-koronel Domingos da Costa dos Santos “ Domin” hahú halo tratamentu ba nia moras durante fulan ida semana rua.

“Matebian enfreta moras kuaze fulan ida semana rua, fofoun moras nia iis la normál, entaun ami-nian médiku militar nian,  Kapitaun Mendes akompaña nia mai iha HNGV hodi teste Swab no nia pozitivu Covid-19, entaun doutor sira lori ba izolamentu Lahane”, informa nia.

Bainhira to’o Lahane matebian kondisaun di’ak, depois semana ida ho balun matebian nia kondisun gravé liután, no Doutór sira troka malu fó tratamentu, maibé situsaun aumenta gravé no doutor sira tau Ventiladór.

Antes ne'e doutór sira tau ventiladór ba matebian, nia sei ko'alia ho Vise Xefe Estadu Maior Jenerál Falur Rate Laek hodi relata nia kondisaun, maibé nia respode katak buat hotu entrega ba Maromak. 

“Entaun família no ha’u rasik semana rua liuba deside transfere nia husi izolamentu Lahene mai iha ICU HNGV to’o ohin nia hakotu iis”, dehan nia.

Kapitaun Mar de Gerra Higinio das Neves, sente triste tanba lakon nia belun di’ak ida ne’ebé durante ne’e hamutuk nafatin.

“Triste boot tanba ha’u lakon ema ne’ebé loroloron la’o ho ha’u iha tempu ida ne’ebé difísil ami nunka husik malu. Maibé tanba de’it Corona ha’u labele kaer nia liman ha’u só haree de’it husi dook”, espresa nia.

Tenente-koronel Domingos da Costa dos Santos “ Domin”, moris iha Lospalos-Lautein 01 fulan-janeiru tinan 1965).

Matebian hakotu iis iha loron sábadu (13/11/2021) tuku 10:23 dader hafoin halo tratamentu intensivu iha ICU-HNGV, Dili.

Durante karreira Militar Matebian mós assume kargu nu'udar Adidu Militár iha Portugál no dadaun ne’e, halo kna’ar iha Kaurtel Jenerál F-FDTL, Fatuhada-Dili. (*)