"Prosesu preparasaun imprime hotu ona, enpakóte profesór sira entrega hotu ona, tau tuir ona hein sira ezame iha dia 18", dehan Diretór Eskola Ensiñu Bazíku Sentral (EBC) 3° Siklu Nu. 03 Vila Nova Munisípiu Baukau, Paulino Suteno Freitas ba www.tempotimor.com iha kna'ar fatin Vila Nova, sábadu (13/11).
Nia haktuir, lolós atu realiza ezame pasajen klase iha loron 22 to'o 27 fulan-novembru tinan 2021, maibé atu selebra aniversariu loron proklamasaun indepedensia ne'ebé serimónia nivél nasionál realiza iha Munisípiu Baukau, nune'e Servisu Ministériu Edukasaun Juventude no Desportu (SMEJD) Baukau realiza fali iha loron 18 to'o 26 fulan novembru 2021.
"Estudante pasa presiza haree valór no mós hare estudante nia partisipa iha ezame tenke 75 pursentu ba leten", nia afirma
Nune'e, estudante oitavu-anu, Anselmo da Cruz afirma, prontu ona atu tuir ezame pasajen klase nian ne'ebé sei realiza tuir loron SMEDJ Baukau avizu ona.
"Durante ne'e mós ami hetan matéria rezumu husi ami nia profesóres sira fahe ba ami estudante iha uma", katak nia
Estudante husi eskola 3° Siklu Nu. 03 Vila Nova Baukau totál husi setimu-anu to'o nunu-anu hamutuk na'in-1003 no sira ne’ebé atu tuir ezame pasajen klase hamutuk na'in-669. (*)