"Husi semináriu ne'e bele muda juventude sira nia hanoin oinsa bele kria dame no páz iha ita nia rai laran, liu-liu mak juventude sira ne'ebé involve iha artemarsias". dehan Xefe komisaun organizadora Ananias Ximenes da Costa ba média sira iha Sede Suku Bukóli, kinta (11/11).

Nia hatutan, seminar ne’e mós planu atu halibur juventude sira iha Suku Bukóli tomak atu halibur malu hanesan juventude sira uluk luta ba ukun rasik-aan ida.

Dosente Universidade da Páz, José Menezes Soares da Costa hatete, iha tempu pasadu juventude nia involvimentu iha organizadu masimu tebes hodi kontribui ba prosesu ukun rasik-aan, tanba ne'e hanesan lisaun ida ba joven sira foinsa'e iha tempu agora.

Ndehan, joven uluk nakonu ho sakrifisiu no organizadu tebes kompara ho agora, tanba joven agora la duun iha unidade, nune'e nia husu ba foinsa'e agora foti lisaun husi juventude uluk.

"Juventude agora ne'e hau bele dehan, lakon orientasaun oituan iha sira nia vida, kompara ho juventude sira uluk, uluk maiória fokus oinsa mak liberta rai ida ne'e, sira presiza aprende barak husi juventude uluk", nia akresenta

Nune’e mós, Xefe Suku Bukóli, Terezinha dos Reis, apresia ho inisiativa juventude ho estudante estajiadu sira husi UNTL ne'ebé mak realiza ona semináriu hodi selebra loron 12 novembru nian,.

"Ida ne'e la'os hanesan teatru ou komedi ne'ebé hare hamnasa, ida ne'e hatudu ba joven sira liu-liu ba joven suku Bucóli para aprende tuir buat ne'ebé mak sira halo", dehan Xefe Suku

Nia haktuir, foin primeira-vez estudante husi UNTL hamutuk ho juventude Suku Bukóli realiza semináriu, nune'e nia parte fó agradese.  

Estudante UNTL hamutuk na’in-18 ne’ebé kompostu husi mane na’in-10 feto na’in-8, husi fakuldade siénsia sosiais ho departementu ketak-ketak hanesan komunikasun sosial, pólitika públika, siénsia pólitika, administrasaun públika, dezenvolvimentu komunitáriu, relasaun internasiona. (*)