"Aproveita loron ne’e, hakarak apela ba ha'u-nia oan joven sira, hadook imi nia-an husi konflitu oioin, tanba imi monu ba kanek no mate, imi-nia-inan-aman mak sei sofre, sei lakon, tanba ne'e di'ak liu mak haka'as imi-nia an ba estudu, tanba mundu ohin loron kompetitivu, sé mak la badinas, la inovativu no la kriativu nia sei hela iha kotuk”, apela Taur Matan Ruak nia mensajen iha Ámbitu loron Nasionál Juventude no Masakre Santa Cruz, 12 Novembru ne'ebé www.tempotimor.com asesu iha pájina ofisiál PM, sesta (12/11).

Maske Governu hasoru instabilidade polítika no probelama seluk maibé Governu la lakon esperansa hodi la'o nafatin ba oin.

"Maske ho difikuldade oioin ne'ebé Governu ida ha'u lidera ne'e hasoru, hanesan instabilidade polítika, resesaun ekonomia, COVID-19 no dezastre naturál maibé ita la lakon esperansa, Governu sei kontinua halo esforsu kria kondisaun atu ita-nia nasaun lao nafatin ba oin”, dehan nia.

Tanba ne’e, husu ba joven sira-nia kontribuisaun hodi estabele rai Timor ne'e ba oin.

“Ita-nia roda ekonomia mós bele lao nafatin hodi bele kria kondisaun ba ita-nia sidadaun sira, tanba hanesan ha’u dehan beibeik, Governu ne'e lakohi husik timoroan ida hela iha kotuk, mas para ida ne’e, ha'u-nia oan joven sira-nia kontribuisaun importante tebes ba estabilidade ita-nia Nasaun nian Ikus liu ha'u dejeza Ksolok Loron Nasionál Juventude ba imi hotu”, afirma nia.

Ministru Prezidensia Konsellu Ministru (MPKM), Fidelis Leite Magalhães, mós husu ba joven sira atu badinas estuda tanba Timor-Leste presiza jovensira nia kontribuisaun.

"Joven sira tenke estuda maka'as tanba nasaun ida ne'e presiza imi-nia kontinua kontribuisaun no ba sira ne'ebé serbisu ona tenke profesionál liután, hanesan imi jornalista sira ho idade joven tenke badinas buka informasaun no profisionál”, dehan nia. (*)