Eroi Timor-Leste, Max Stahl ne'ebé mak hakotu iis iha Ospitál Princess Alexandra Brisbane, Austrália, tuku 04:30 oras austrália nia.
Tuir karta ne’ebé www.tempotimor.com asesu iha loron kinta (28/10), hanesan Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão, sente triste no lakon ona jornalista di’ak Max Stahl.
Xanana hatete, Max Stahl jornalista ida ne’ebé brani tebes fó sai ba mundu situasaun ne’ebé akontese iha Timor-Leste. Tanba nia brani mak halo mudansa ba situasaun Timor-Leste.
Tanba liuhusi publikasaun no filmajen husi Max Stahl mundu deskobre asasinatu husi Militar Indonézia ba povu Timor-Leste liliu Maskre Santa Cruz 1991, ne’ebé rezulta ema barak lakon vida.
Iha akontesimentu Masakre Santa Cruz tinan 1991 bele loke mundu nia matan ba prosesu luta povu Timor-Leste nian.
Ho kontribuisaun barak ne’ebé halo ba Timor-Leste, Max nian la hotu de'it iha masakre 12 Novembru1991, maibé mós iha ukun-an.
Max Sthal ne’ebé oferese-an tomak ba prepara dokumentu kona-ba istória luta Timor-Leste nian liuhusi Centro Audiovizual Max Stahl Timor-Leste (CAMSTL).
Christopher Wenner, koñesidu liu ho naran Max Stahl, moris iha loron 6 fulan-dezembru tinan 1954 iha Reinu Unidu (Inglaterra), hetan kondekorasaun husi Estadu Timor-Leste ho Orde Timor no nia kontribuisaun rasik sai kuinesidu no povu Timor-Leste hadomi tebes nia.
“Ha’u sente lakon tebes Max Stahl no susar tebes atu haluha nia kontribuisaun. Max iha Povu Timor-Leste nia fuan no nia kontribuisaun metin iha ita-nia fuan”, afirma Xanana iha karta ba família.
Xanana Gusmão, hato’o sentidu kondolénsia klean tebes ba família kuandu hanoin hikas buat saida mak Max Stahl halo ona mai Timor-Leste.
“Adeus Max, o isin mak mate, maibé o nia istória metin iha ami fuan no sei konta husi jerasaun ba jerasaun”, deklara Xanana Gusmão. (*)