"Prezidente Repúblika alerta ba Governu paraque halo atensaun, liliu tanba iha informasaun ne'ebé ha'u simu iha semana liuba família hakarak lori filafali ninia sinzas, mais nia sei liu prosesu akramasaun depois nia latun sei lori mai", dehan Taur hafoin enkontru semanal ho PR Lú Olo iha Palasíu Prezidente Bairopite, kinta (28/10).
Nune'e Governu atensaun hela pasu saida mak bele halo, liliu ba família sira iha kualker forma.
"Mais aproveta manifestas ita-nia sentidu kondolénsia ba lakon jornalista ida iha amigu Timor nian ami lakon, e fó korajen ba nia família sira para que bele akompaña husi situasaun ne'e ho seriedade, kalma, forsa korajen", hatete Taur.
Kona-ba translasaun Governu hanoin laiha tanba tuir informsaun ne'ebé Governu hatene, ne'e primeiru akramasaun (sunu) hafoin mak nia latun lori mai.
"Nia latun mai buat kiikoan ida sei lori mai, mais ami preparadu los, ita haree tok prosesu saida mak la'o ba oin, pois presiza apoiu naturalmente tuir kbi’it no kondisaun ne'ebé ita iha", hatutan Taur.
Liliu nia partisipasaun iha 12 novembru ne'e importante, tanba ne'e parlamentu fó sidadaun onorabel ba nia.
"Ita konsidera nia hanesan timoroan mós ba nia aktus sira ne'e. La'ós de'it 12 novembru, maibé relasaun ho ami-nia ai-laran mós di'ak kona-ba entrevista no vizita sira", esplika nia.
Entretantu liga ba edifísiu Max Stahl dadaun ne'e Governu agora haree hela atu tau matan, liliu timoroan sira ne'ebé servisu iha ne'ebá, tanba istória luta Timor nian iha ne'ebá, entaun iha tempu badak Governu sei haree kontinua tau matan ba sira. (*)