Tempotimor (Díli) – Ministra Edukasaun, Juventude no Desportu (MEJD), Dulce de Jesus halo lansamentu ba pontus Ezame Nasionál (EN), Segunda (02/09/19) iha edifisiu Imprensa Nasionál, Colmera, Díli.
Iha lansamentu ne'e, MEJD hatete antes tama iha Ezame Nasionál ne'ebé sei realiza iha loron 14-16 Outubru 2019, materia hirak ne'e, tenke preparadu.
"Preparasaun ne'e importante tebes. Inklui mós ba estudante sira atu prepara sira-nia an ba Ezame Nasionál. MEJD tau importansia boot tebes ba prosesu aprendizajen ne'e, sai hanesan fator importante ba estudante sira hodi aplika buat ne'ebé sira aprende ona iha eskola nomós iha sira nia moris," Dulce esplika.
Iha fatin hanesan, Diretór Jerál Polítika Planeamentu no Kooperasaun MEJD, Antoninho Pires katak kona-ba pontus ezame, MEJD sei hala'o servisu hamutuk ho UNTL ne'ebé sei finaliza iha fulan Setembru nia rohan.
"Pontus de ezame ne'e, sei hotu tuir kalendariu ne'ebé iha. Hanesan kalendariu nasionál iha fulan Outubru nia laran, tenke tama ona Ezame Nasionál. Pontus ezame ne'e, sei finaliza iha fulan Setembru antes tama ba ezame nasional," Antoninho hatete.