Print this page

Timoroan 5.492 ‘Hadau Malu’ Formasaun Lian Korea

By October 26, 2021 2062
Joven Timoroan sira tuir hela teste ba Formasaun lian Korea iha Estadiu Munisípiu Dili, tersa (26/10). Joven Timoroan sira tuir hela teste ba Formasaun lian Korea iha Estadiu Munisípiu Dili, tersa (26/10). Foto Tempo Timor

Tempotimor (Dili)-Sekretáriu Estadu Formasaun  Profisionál Empregu (SEFOPE) hahú halo teste ba timoroan hamutuk ema na'in-5.492 ne’ebé hadau malu hodi tuir formasaun lian korea.

"Objetivu ba loron ohin ida ne'e, ita marka tan istória ida hodi hala'o ita-nia teste ba kandidatu sira ne'ebé mak hakarak iha interese, ba tuir lian Korea”, dehan  Diretór Nasionál exteriór Empregu, Filomeno Soares, iha estadiu Munisípiu Dili, tersa (26/10).

Tanba durante surtu covid-19, atividade kona-ba  formasaun lian Korea la halo rekrutamentu ba kandidatu foun, hodi kumpri orientasaun husi  Ministériu Saúde.

"Iha tinan 2020 Covid-19 invade Timor-Leste, entaun ita lahalo rekrutamentu ba kandidatu foun sira, tanba ita tenke kumpri orientasaun Ministériu Saúde nian kona-ba regra Covid-19. Durante ne'e ita hahú halo rekrutamentu ba kursu lian Korea iha tinan 2019, ne'ebé agora mak ita hahú fali halo rekrutamentu ba  tinan 2021”, informa nia.

Kandidatu ne'ebé mak agora partisipa iha ne'e hamutuk ema na'in-5.492, no sei iha kompetisaun tanba númeru ne'ebé atu tuir kursu ne'e hamutuk na'in-2.500 de'it.

"Kompetisaun ho númeru ne'ebé boot, ne'ebé ha'u husu ba ita-boot sira tenke hakas-an ba, nune'e bele hetan oportunidade ida ne'e, hodi bele tuir formasaun lian Korea nian”, hatete nia.

Diretór Jerál Interinu SEFOPE, Mateus dos Santos Tallo hatete, politika nasionál empregu ninian tuir metas ne'ebé mak iha katak, kada tinan sei fó oportunidade ba joven Timoroan hamutuk 2.500 ne'ebé mak sei partisipa iha kursu lian Korea.

"Teste ida ne'e halo ba dala rua, teste primeiru iha tinan 2019, tinan 2020 ne'e surtu covid-19, ita la konsege realiza, ne'ebé agora mak ita realiza filafali ba tinan ida ne’e”, esplika nia. (*)

 

Rate this item
(2 votes)
Last modified on Tuesday, 26 October 2021 15:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items