Profesóra Eskola Kafé Vila Antiga Baukau, Adriana Soares informa, koloka estudante na’in-31 mai partisipa serimonia ne’e, tanba hetan konvite husi komisaun organizadóra, maibé laiha kadeira ba estudante sira.
"Hau lori hau nia estudante mai atu partisipa seremonia ne'e, maibé hau nia estudante tuur iha rai hau sente triste oituan", nia dehan iha salaun sentru konvensaun (CCB- sigla portugues) Baukau tersa (26/10).
Nune'e, husu ba komisaun organizadóra bainhira realiza serimonia importante ruma, presiza iha preparasaun masimu, labele atende balun tur iha kadeira no balun tur iha rai.
"Hahalok hanesan la'os halo diskriminasaun, maibé la duun konsidera labarik ki'ik oan sira", dehan nia
Kestaun ne’e, Prezidente Komisaun Organizadóra, Augostino Euzebio Guterres rekoiñese katak, iha preparasaun ne'e la masimu, tanba prepara de'it kadeira bazeia ba konvite ne'ebé iha.
Nia afirma, konvite ne'ebé fahe ba konvidadus, hamutuk 200 no ba mós estudante sira, maibé ba reprezentante kada eskola ema ida ou rua de’it, la'os ba estudante ho númeru ne’ebé boot.
"Maibé Baukau ita hotu nian, entaun mai barak preparasaun kadera ba alin oan sira mak laiha, nune'e konvidadus sira ita haruka tu'ur, alin sira ho situasaun hanesan ne'e", nia esklarese
Naksalak ne’e, nia hodi komisaun organizadóra nia naran hato'o deskulpa ba entidades no mós ba estudante sira hotu. (*)