"Se ita konsidera feto nu'udar ajente tranformadór iha família no sosiadade, entaun tenke mane buka oinsá hodi kompleta malu. Ita tenke apresia ba kapasidade feto nian, ita tenke soe uzu kostume la apresia ema, sa tan la apresia feto", dehan Xefe Casa Sivíl, Francisco Vasconcelho, ne’ebé reprezenta PreIdente Republika ba komemorasaun loron mundial feto rurál iha postu Administrativu Tutuala, Munisípiu Lautein, sesta (22/10).

Tanba dalabarak mane apresia fali ema nia fen duke nia fen, feto ida ne'ebá bonita liu, tanba ne'e dalabarak mosu problema iha família. Maibé Prezidente Repúblika hanoin atu halakon kestaun sira mak parte mane no feto tenke suporta malu.

"Ha'u hakarak hato'o ha'u kongratulasaun no hakuak boot ba feto rurál sira. Ita labele marjenilizadu feto sira, ha'u ko’alia ba mane sira ita tenke sai parseiru di'ak no tenke sai lideransa iha ita-nia familia", dehan nia.

Nune'e, apresia ba envolvimentu feto agora kompara ho tinan uluk sira. Tanba dadaun ne'e, feto iha área ruràl hahú enpodera-an iha kualker grupu halo produsaun sira iha sosiadade. (*)