Prezidente Komisaun G, António Verdial hatete, tuir loloos, MEJD kuandu laiha tempu atu mai plenária, entaun Ministru la presiza haruka karta ba PN tanba sei iha dalan seluk atubele kontaktu malu.

"Kuandu atu hatudu ona karta hanesan ne'e, siknifika eselénsia Ministru la konsidera reprezentante povu 65 iha uma fukun. Tanba ne'e mak hanesan deputadu ha'u husu ba Prezidente favór ida oinsá asegura ita-nia orgaun soberania daruak ida ne'e, hodi hatuur ita-nia dignidade atu nune'e Governu tenke respeita orgaun soberania daruak Parlamentu Nasionál”, dehan nia iha Parlamentu Nasionál, tersa (19/10).

Hatan ba kestaun ne'e Prezidente Parlamentu Nasionál (PN), Aniceto Longuinhos Guterres Lopes hatete, kona-bá ejizensia ne'e, meza PN deside sei konvoka plenária estraordináriu ida ho Ministériu Edukasaun Juventude no Desportu, molok ba debate OJE 2022.

Aleinde liga ba rekerimentu interpelasaun ne'ebé interpelante sira hato'o, Prezidente PN halo despaisu haruka ba Ministru Edukasaun Juventude no Desportu, atu marka prezensa iha Parlamentu.

Maibé iha momentu ne'e karta seidauk sai, tanba iha plenária segunda (18/19), depois meza rona tiha ejizensia husi plenária, no meza konsege haruka gabinete kontaktu direta hodi husu Ministru, atu marka prezensa iha plenária estraordinária iha loron kuarta (20/10).

Tanba ne'e, Ministru Edukasaun Juventude Desportu fó resposta ida liuhusi karta ne'ebé haruka mai PN iha loron tersa (19/10) katak sei la disponivel atu marka prezensa iha plenária, tanba Ministru Edukasaun sei destakadu ba Bobonaro, atu hala'o programa vasinasaun. (*)