Iha komemorasain loron Balibo-five ba dala haatnolu-resin-neen (46) husi 16 Outubru 1975-16 outubru 2021, bainhira Militár Indonézia domina Balibo no Maliana.
Iha atake ne’e, tropa Indonézia sira mós oho jornalista internasional na’in-lima (5) husi Estasaun Televizaun Australiana hanesan, Greg Shackleton (29) no Tony Stewart (21), husi Australia hamutuk ho Gary Cunningham (27) husi Nova Zelandia servisu ba Estasaun Televizaun Channel Seven iha Melbourne. Brian Peters (26) no Malcolm Rennie (29), husi Inglaterra, servisu ba Estasaun Televizaun Channel Nine iha Sydney.
Ho akontesimentu ne’e, tuir informasaun ne’ebé www.tempotimor.com, asesu husi pájina Facebook Austrália in Timor-Leste, iha loron domingu (17/10) katai, ba loron aniversáriu jornalista australianu sira-nia mate. “Ami ba hamutuk ho Nova Zelanda hodi hanoin hikas jornalista Australianu na’in-lima ne’ebé mak lakon sira-nia moris iha Balibo, Timor-leste, Greg Shackleton, Gary Cunningham, Tony Stewart, Malcom Rennie no Brian Peters”,
“Ami mós hanoin hikas Roger East, jornalista Australianu seluk ida ne’ebé mak lakon nia moris iha Timor-Leste iha tempu badak depoisde sira seluk, bainhira hala’o relatóriu kona-ba turbulénsia ba eventu sira iha tempu ne’ebá”.
Iha serimónia ne’e, Embaixada Nova Zelándia horisehik (15/10) iha Dili, Austrália nia Adjunta Embaixadór Suzanne Wilson-Uilelea hamutuk ho Enkaregadu Adjunta Embaixadór Yvonne McKinnel tau ai-funan.
Nune’e sira mós presta omenajen ba koneksaun no parseria ne’ebé metin husi Australianu, Novos Zelándia sira ho povu husi Balibo. (*)
