"Ha'u-nia apelo ba inan aman sira joven sira Komúnidade hotu, tau matan mós ba ita-nia infraestrutura sira iha ita-nia rai, tanba ha'u haree ita-nia estrada ne'ebé ba munisípiu sira ne'e ita tau espellu para ema mai karik haree, karreta ne'ebé mai husi oin husi kotuk ita bele haree, maibé ema tuda rahun hotu”, dehan PM Taur bainhira Inaugura Postu Tránzitu PNTL ne'ebé oferese husi Emprezáriu Mahoka, iha Bairopite, kuarta (13/10).

Iha  jardim sira ne'ebé tau lampu no kadeira sira mós baku rahun hotu no husik tiha animal iha laran, tanba ne’e hatudu komunidade la'ós na’in ba dezenvolvimentu, nune'e mak nia estraga hotu sasán:

"Buat ida ne'ebé la'ós ita-nia ne'e tuda rahun sei saida oituan, maibé ida ita-nia mak ita tuda rahun ne'e, sentimentu na’in ba sasán ne'e seidauk iha, ne'e susar la halimar ba dezenvolvimentu iha ita-nia nasaun, ne'e ita hatudu katak ita la'ós na’in ba rai ida ne'e, no nain ba sasán sira ne'e”, dehan nia.

Tanba ne'e apelu ba inan aman, joven sira katak buat sira ne’ebé iha Timoroan mak na’in tanba ne'e kuidadu no hadomi ba hodi halo sidade iha Timor-Leste kapás no furak. (*)