“Ami-nia objetivu hasoru malu ho Prezidente Repúblika, atu hato'o kona-ba prosesu ba halo gravasaun múzika ne'ebé sua exelénsia rasik mak nu'udar kompozitór ba muzika sira ne'e ami halo hotu ona ne’e mak, ami mai aprezenta”, dehan nia hafoin sorumutu ho PR Lú Olo iha Palásiu Prezidensiál Bairopite, tersa (12/10).
Múzika ne'e liga ba valor istória luta nian, nomós haree liuba valór ambientál, tanba ne'e mak banda husi Sibi Sama ho membru sira hotu mai aprezenta ba Prezidente Repúblika.
"Múzika sira ne'e Prezidente Repúblika, Francisco Guterres 'Lú Olo' nian, hamutuk 7 no múzika ida halo iha tempu rezisténsia mak Maubere por Me no ida kona-ba bailoron naruk no seluk kona-ba buat ne'ebé liu ona no iha mós múzika haat seluk tan”, informa nia.
Muzika sira ne'e hamutuk 7 ho adisionál rua portantu hamutuk 9, liuhusi múzika ne'ebé mak Prezidente Republika halo atubele hametin nasionalizmu no patriotizmu nomós promove mós artista sira atu kanta di'ak liu iha futuru no bele dezenvolve múzika iha Timor-Leste.
"Múzika 9 ne'e iha ida mak kanta ho portuguéz Maubere por Me ne'ebé fó sai ona antes 30 de Agosto no múzika ne'e iha ona Youtube, no futuru mai sei fó sai tan múzika seluk iha youtube nune'e povu tomak bele asesu", dehan nia.
Enkuantu Prezidente Repúblika, Francisco Guterres 'Lú Olo', sente haksolok tebes liliu ba membru artista sira ne'ebé halo kontribuisaun ba múzika ne'ebé kompozitor mai husi nia rasik.
"Xefe Estadu asiste ona múzika no hatete importante mak múzika ne'e tradus sentimentu espresaun atu partilla buat ruma ba sosiedade sira relasiona ona ho espresaun sira ne'ebé mak durante ne'e PR sente iha jornada luta libertasaun nasionál”, hatutan nia. (*)