Atividade ne'e plan internasionál organiza hodi komemora loron mundiál labarik feto, ne'ebé kada tinan sempre selebra iha loron 11 Outubru, nune'e fó oportunidade ba labarik feto asume kargu ezekutivu hodi hetan esperiénsia.

Iha biban ne'e, Claudia Ximenes apresia no orgullu tanba bele asume kna’ar nu'udar prezidente konsellu Imprensa (KI) durante iha oras ida nia laran

“Agradese wain ba KI, señór Virgilio da Silva Guterres, ne'ebé fó ona oportunidade mai ha'u Claudia Ximenes, atu asume kna’ar hanesan prezidente KI durante iha oras balun nia laran, agradese mós ba plan internasionál ne'ebé mak identifika ami-nia mentalidade hodi partisipa iha momentu kmanek ida ne'e, no ha'u sente orgullu tebes bainhira asume kna’ar ne'e”, dehan Claudia Ximenes, iha Salaun KI, Kintal-Boot, sesta (08/10).

Aleinde ne'e, Claudia Ximenes rekomenda ba KI, no membru KI atu hamoris garante biban no leet ba feto no mane hanesan.

Maibé labarik feto sira atu asesu ba mídia Sosiál ne'ebé seguru husi informasaun falsu sira no husu atu garante no promove sidadun sira-nia direitu no liberdade fundamental.

Setór ba programa parentidade no jestaun Plan Internasionál, Dirsia Sarmento hatete, atividade ne'e la'ós foin ba dahuluk maibé ne'e beibeik ona no iha mundu tomak hotu halo, hahú husi labarik sira asume kargu ezekutivu iha oras balun nia laran.

"Buat ne'ebé ami halo, ba labarik feto sira asume kargu iha oras balun nia laran ne'e, hanesan kampaña ida ne'ebé Plan internasionál halo iha mundu tomak, atu nune'e labarik sira aprende sai lideransa ne'e oinsá, ne'e hanesan maneira ida mós Plan internasionál halo, hodi fó oportunidade ba labarik feto sira atubele realiza sira-nia mehi husi dalan sira hanesan ne'e”, dehan nia:

Durante Claudia Ximenes asume kargu nu'udar prezidente Konsellu Imprensa, nia parte halo vizita ba diresaun sira ne'ebé tutela ba KI. (*)