“Falta fulan rua estudante sira atu hala'o ona sira-nia ezame finál, tanba ne'e ha'u husu favor ba mestre sira atu reviu filafali materia ba sira, durante fulan rua ne'e nia laran, hodi rekupera materia sira ne'e hotu ba estudante sira”, dehan Armindo Maia, iha eskola 30 de agusto, kinta (07/10).
Prosesu aprendisajen ba estudante sira hahú husi pre-eskolar to’o universidade sira durante fulan barak nia laran atrazadu tanba impaktu husi pandemia Covid-19.
Maibé dadaun ne'e, estudante sira hahú filafali prosesu aprendisajen prezensiál tanba tuir dadus ministáriu saúde (MS) númeru pasiénte pozitivu Covid-19 iha Timor-Leste menus.
“Husu ba mestre sira tenke tau forsa hamutuk, hodi rekupera tempu no matéria sira ne'ebé lakon ona, nune'e hatudu ita-boot sira-nia responsabilidade ba estudante sira, tanba durante mestre sira hela iha uma mós simu nafatin osan”, afirma nia.
Ba materia ne’ebé reviu ba estudante sira ne'ebé la konsege hanorin durante pandemia Covid-19 ne'e maske la to’o pursentu atus-ida (100%) mós pelumenus atinje 80% antes tama iha meadus fulan-dezembru hodi tama iha ezame finál. (*)