Babo Hakotu Estudu iha Quinto Ano Hakat ba Vida Negósiu

Babo Ximenes ne’ebé fa’an hela modo ne’ebé tuka ho gerobak iha kapital Dili, sábadu (02/10).  Babo Ximenes ne’ebé fa’an hela modo ne’ebé tuka ho gerobak iha kapital Dili, sábadu (02/10).  Foto Tempo Timor

Tempotimor (Dili)-Moris iha mundu sempre iha mudansa tuir ida-idak nia destinu, maske balu moris ho buat hotu ne’ebé kompletu, iha mós balun moris ho difikuldade nia laran.

Tanba situasaun ne’ebé mosu iha moris labarik balun sente kontente no hakmatek ho ninia estudu iha nível ensinu báziku, maibé oinseluk ho labarik, Babo Ximenes (14) obrigadu hapara nia estudu iha Quinto ano (Klase V), tanba osan laiha atu kompleta nesesidade eskola nian.

Ho difikuldade ne’e, labarik inosente deside hapara estudu hodi hakat ba vida negòsiu atubele ajuda família hodi kompleta nesesidade loroloron ninian.

“Ha'u sai husi eskola, tanba osan laiha atu sosa ha'u nia presiza, ha'u gosta buat oioin maibé ha'u-nia ama ho apa la fó osan ha'u, tanba ha'u-nia ama-apa mós osan laiha, entaun ha'u deside sai husi eskola", ho triste no hakruk Babo konta ba www.tempotimor.com  iha Fatuhada, sábadu (02/10).

Tanba ne’e, iha tinan 2019, Babo sai husi eskola, bainhira nia sei tur iha banku primaria quinto ano, no nia deside fa’an modo hodi ajuda nia inan ho aman atubele responde ba sira-nia nesesidade no haree nia alin sira-nia atu kontinua estudu, tanba nia mak nu'udar oan dahuluk husi maun alin na’in-haat (4).

 "Ami maun alin hamutuk na’in-haat. Ha'u nu'udar oan primeiru tanba ne'e ha'u sai eskola hodi ajuda ha'u-nia ama ho apa hodi responde ba ami-nia nesesidade no bele haree mós ha'u-nia alin sira-nia eskola”, esplika nia.

Maske Babo ho tinan ne’ebé ki’ik, maibé iha ona hanoin oinsá bele sakrifika nia-an hodi salva alin sira eskola, tanba nia sai husi eskola la'ós nia inan aman mak haruka, maibé nia rasik mak foti desizaun hodi hapara nia estudu, tanba nia sente katak nia inan aman de'it labele responde ba sira na’in-haat nia nesesidade hotu, ho nune'e nia hapara estudu hodi fa’an modo.

"Sente katak ha'u-nia ama apa labele responde mesak ba ami-nia presiza, no ha'u sai eskola mós la'ós ha'u-nia apa ama mak haruka ha'u sai, maibé ha'u rasik mak sai, tanba ha'u falta (presiza) buat barak los, entaun ha'u husu ha'u-nia apa halo gerobak ida hodi ha'u uza ba fa’an modo”, hatete Babo ho oin ne’ebé triste.

Babo nia inan ne’ebé servisu hanesan fila liman hamutuk ho nia aman iha area Komoro.

Maske Babo hakotu nia estudu, maibé lakohi alin sira atu hakat tuir nia, tanba ne’e Babo kontinua enkoraza no motiva alin na’in-2 ne’ebé dadaun eskola iha hala'o eskola primaria Koomoro-Dili, no nia alin ikun ne’ebé idade seidauk to’o atu eskola. (*)

Rate this item
(0 votes)
Last modified on Saturday, 02 October 2021 18:17
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« December 2021 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Tempo Timor Networks

Online Counter