“Konsidera abilidade no kapasidade graduandu sira,ne'ebé sai sasukat ba ICR iha tinan ida ne'e hodi deside graduasaun,ho nune'e ita fo parabéns ba esforsu sira-nia”, dehan Reitór ICR, Padre Crisostomo I.Salar, iha serimónia graduasaun VIII turnu ICR nia, iha Salaun katedral, Vilaverde, kinta (30/09).

Maske hasoru obstakulu, bainhira nasaun tama iha situasaun pandemia Covid-19, maibé konsege forma finalista sira to’o hetan graduasaun. Tanba graduasaun ne'e nu'udar pasu ida atu re-integra hikas estudante sira ba komunidade.

“Buka atu halo di'ak liután no kontinua kapasita-an nafatin atu sai estudante ka sidadun ida nakonu ho kapasidade, koñesimentu no abilidade. ICR sei orgullu bainhira haree ninia oan sira sai figura importánte iha komunidade nia leet”, dehan nia.

Graduandu Ana Fatima, husi fakuldade formasaun profesór morál no relijaun katólika hatete, ICR ne'e sai nu'udar uma mahon daruak ba sira, tanba Institutu ne'e mak hakonu ona estudante sira ho siénsia multimedia relijaun no morál atu dezenvolve vida umana.

“Tanba uma edukasaun ne'e dinámiku no movél, edukasaun ne'e moris tanba eduka ema moris, ema ne'ebé Maromak nia imajen rasik. Edukasaun ne'e moris tanba eziste iha ema nia moris no halo ema sai Parseiru Maromak nia”, afirma nia.

ICR hatudu ona plataforma polítiku aprendisajen, hodi hametin relijaun moral sai abut no huun ba prosesu aprendisajen hotu, katak relijaun moral mak hatudu siénsia ho naroman lolos.

"Ami sira ne'ebé simu ona graduasaun ne'e kompromete sei kuidadu almamater ICR nian hodi hamorin nafatin iha sosiadade nia le'et”, dehan nia. (*)