Ministru Prezidénsia Konsellu Ministru, Fidelis Leite Magalhães hatete, revogasaun ne'e atu halo di'ak liután mekanizmu sira atu Timoroan ne'ebé mak iha kapasidade bele hala'o nia estudu iha estranjeiru liuhusi MESSK.

"Aprova mós projetu Dekretu-Lei ne'ebé aprezenta husi Ministru Ensinu Superior, Siénsia no Kultura, Longuinhos dos Santos, katak revoga Dekretu-Lei n. 30/2008, loron 13 fulan-agostu, kona-ba rejime atribuisaun bolsa estudu iha estranjeiru ida ne'e atu halo di'ak liu ho mekanizmu ne'ebé di'ak liután ba timoroan sira hotu ne'ebé mak iha matenek hakarak kompete ba eskola iha li'ur sira bele konkore liuhusi Ministru Ensinu Superior”, dehan Fidelis iha Palásiu Governu hafoin reuniaun Konsellu Ministru, kuarta (29/09).

Revogasaun ba rejime lei ne'e, atu halo atribuisaun ba sidadaun Timoroan ne'ebé mak kontinua estudu universidade atu regula di’ak liután ba regula diploma husi MESSK nia hodi tuir de'it fali regulamentu iha Fundu Dezenvolvimentu Kapitál Umanu (FDCH).

"Atribuisaun bolsa estudu iha estranjeiru sei regula husi diploma ministeriál MESSK nian, tuir regulamentu husi Fundu Dezenvolvimentu Kapitál Umanu nian”, dehan nia.

Iha ne’e mós atu garante loloos aplikasaun regulamentu FDCH nian, hodi hadi'a mekanizmu sira protesaun ba estudante Timoroan sira iha estranjeiru no atu klarifika, hadi'a no moderniza sistema juridiku iha setór ensinu superior nian. (*)