Tanba debate televizivu ne’e hanesan inisiativa husi Sekretáriu Estadu ba Formasaun Profisionál no Empregu (SEFOPE) no WDPTL, fornese Plataforma ida ba lian no ideia sira ne’ebé foka iha dalan ba empregu ba populasaun juventude Timor-Leste nian ne’ebé aumenta ba beibeik.
Bainaka to’o ohin loron inklui José Ramos Horta, Alarico de Rosário, Sekretáriu Estadu SEFOPE, Chief Executive Officer-Baku Nasionál Komersiu Timor-Leste (CEO-BNCTL) no Xefe Gabinete Primeiru Ministru.
Iha seremónia asina akordu ne’e, Prezidente RTTL.ep, José António Belo hatete, sira kontente ho akordu ne’ebé halo, tanba bele hadi’ak programa debate refere.
“Ami kontente tebes hodi asina akordu ida ne’e ho WDPTL, tanba liuhusi akordu ida ne’e bele hadi’ak liután programa série debate televizivu (TV talkshow) Dalan ba Hetan Empregu hodi fó inspirasaun ba ita-nia joven sira no fó hanoin ba ita-nia setór Governu”, dehan Taraleu, kinta (23/09).
Debate televizivu Dalan ba Hetan Empregu ida ne’e fó sai kada semana rua iha RTTL, iha Kuarta tuku 8 kalan. Iha debate sira tuir mai sei esplora papél empregadór, koperativa, sistema formasaun, grupu juventude, igreja, sosiedade sivíl no líder polítiku sira-nian oinsá atu buka solusaun di’ak liuba dezafiu dezempregu nian no asegura dalan ba servisu ne’ebé ho dignu.
Moderadór debate televizivu no Espesialista Empregu, Geraldo Ximenes hatete, ho pandemia ne’ebé fó impaktu ba taxa empregu, ho tan númeru joven Timoroan kompete iha merkadu traballu ne’ebé aumenta no eleisaun prezidensiál tinan oin, série debate televizivu ida ne’e fornese forum ida iha tempu ne’ebé loos hodi konvoka konversasaun sira atu identifika solusaun ne’ebé sustentavel ba dezafiu dezempregu iha Timor-Leste. (*)