Tempotimor (Bobonaro) – Reitór Universidade Nasionál Timor Lorosa'e (UNTL), Francisco Miguel Martins promete ba públiku iha Suku Tapo, Bobonaro sei fó apoiu mós karteira ba eskola hirak ne'ebé iha parte Leste.
"UNTL tenke tau importansia ba komunidade nia preokupasaun. Tanba, UNTL moris ho komunidade,” hatete Reitór UNTL ne'e iha seremonia entrega karteira ba Ensinu Baziku Centrál (EBC) Tapo, Bobonaro.
Ba funsionáriu UNTL, reitór husu atu organiza mós atividade refere ba eskola hirak ne'ebé iha parte Leste hanesan iha Munisípiu Baucau, Vikeke no Lautem. “Importante sira solisita. Sei presiza reitór nia prezensa, reitór tenke habiban an. Kansela ajenda sira seluk, mezmu atividade iha universidade barak, maibé ita tenke tau importansia ba komunidade," Francisco Martins promote.
Nia dehan, tenke tane aas komunidade. Respeita no valoriza komunidade nia hakarak. Tanba, universidade atu servi komunidade. Universidade iha responsabilidade sosiál ba komunidade.