Tempotimor (Bobonaro) – Eskola Ensinu Bazika Sentrál (EBS) Tapo, agradese ba Universidade Nasionál Timor Lorosa'e (UNTL) ne'ebé fó ona apoiu karteira 40 ba eskola refere.
Diretór EBC Tapo, Feliciano Candido agradese ba Universidade Nasionál Timor Lorosa'e (UNTL), ne'ebé hatán ona saida mak durante ne'e, sai preokupasaun husi eskola refere.
"Ami nia proposta ne'e, ami halo ba UNTL bazeia ba enkontru eskola no autoridade lokál sira. Tanba, ha'u akompaña iha televizaun katak UNTL apoiu mós ba eskola balun. Entaun ha'u halo proposta ba UNTL. Ne'ebé, ohin ami simu ona kadeira 40. Iha proposta, ami husu atus rua (200 karteira). Maibé, ami foin simu 40," dehan Diretór EBC Tapo, Feliciano Candido, Sabadu (17/08/19) iha área eskola ne'e.
Iha serimonia entrega karteira ne'e, Reitór UNTL, Francisco Miguel Martins husu ba profesores, komunidade inklui estudante sira atu utiliza ho responsabilidade karteira hirak ne'e.
"Kadeira ida ne'e, ema barak mak tuur no matenek ona. Inklui ita nia atuál Prezidente Repúblika no ministru lubuk ida, ne'ebe oras ne iha Governu. Tanba ne'e, hein katak liuhosi kadeira hirak ne'e, sei inspira alin sira hodi aprende no sai ema ne'ebé matenek. Tanba ne'e, nu'udar Reitór UNTL, ha'u husu ba profesores, komunidade inklui estudante sira atu utiliza ho responsabilidade ba karteira hirak ne'e," dehan Francisco.
Entretantu, Francisco mós promete sei halo kompleta karteira hira ne'e, bazeia ba proposta husi eskola.
Estudante ne'ebé to'o agora tuir hela prosesu aprendizajen iha EBC Tapo, hamutuk 317 alunus, kompostu ho sala 3, profesor 12, inklui diretór eskola.