“Ita-nia omenajen ba sira hotu ne’ebé mate antes, depois no iha loron referendu ne’e, atu sira-nia klamar hetan fatin hakmatek iha Lalehan, no tulun Povu tomak moris saudável, hakmatek no prósperu nafatin”, dehan nia liuhosi komunikadu imprensa iha PN, sesta (27/08).

Iha tinan 22 liubá, bainhira Povu Timor-Leste hamriik ho aten brani deside Timor-Leste nia libertasaun no independénsia, loron 30 fulan-agostu tinan 1999, mak sai hanesan loron ida ne’ebé determinante ba rezisténsia tomak, liliu demokrasia no direitu umanu ba Timor-Leste.

Durante selebrasaun loron vitória polítika ba Timor-Leste, povu barak konsege sakrifika-an dala-ida tán iha loron desizivu finál ida ne’e hodi ba nia futuru.

Maske, tinan ida-ne’e, Timor-Leste labele selebra loron importante ida-ne’e ho atividade festivu, tanba hasoru daudaun hela pandemia COVID-19.

Maibé, nu'udar husu sidadaun idak-idak kontinua refleta nafatin loron ida-ne’e nia sentidu no nia valór ba Timor-Leste, agora no iha futuru, iha idak-idak nia fatin.

"Husu povu tomak, kuidadu idak-idak nia saúde, kuidadu ema seluk nia saúde no salva nasaun", dehan nia. (*)