"Parabéns ba Rádiu Komunidade foun Rádiu Komunidade Defisiensia ne'ebé foin atu hahú no iha, espera ho imi-nia ezisténsia ne'e bele ajuda imi iha komunikasaun ne'ebé di'ak no besik liután ba komunidade sira. Ha'u fiar katak prosesu tuir mai ne'e la'ós fasil maibé ho imi-nia ezisténsia ne'e sei bele", dehan Mericio Akara, iha salaun JL Villa, Fatuhada, segunda (23/08).
Tanba ne'e, husu ba rádiu komunidade defisiensia atu halo jestaun, lidera no sai jornalista rasik ba sira-nia rádiu komunidade defisiensia no ekipa SEKomS sai fasilitadór.
"Ha'u husu ita-boot sira tenke jere rasik, lidera rasik sai jornalista rasik e ha'u hakarak ekipa SEKomS sai fasilitadór de'it, ida ne'e mak ha'u husu ba maluk defisiensia sira ita-boot sira direitu hanesan kapasidade hanesan ho sira seluk tanba ne'e mak ha'u fiar katak imi sei bele", afirma nia.
Prezidente Konsellu Rádiu Komunidade Defisiensia, Gaspar Afonso hatete, maske sira-nia koñesimentu mínimu iha área komunikasaun maibé sira husu tulun ba entidade sira hotu atu apoiu nune'e sira mós bele Tatoli sira-nia lian ba maluk ema seluk.
"Maske ami-nia koñesimentu mínimu iha área komunikasaun, maibé ami tenta husu tulun ba entidade sira bele apoiu ami atu nune'e ami-nia lian ne'e la'ós iha worksop sira ka iha konferénsia sira maibé ami rasik Tatoli ba ami-nia maluk sira iha Timor laran tomak, atu nune'e sira hotu bele hatene ona katak ohin loron iha ona Rádiu Komunidade defisiensia", dehan Gaspar.
Antes ne'e defisiente sira aprende ona iha rádiu lubuk ida ba tinan barak ona no hakarak inklina-an iha mundu mídia nia atu nune'e sira ko'alia rasik no iha direitu hanesan ho sira seluk, no sai jestór ba sira-nia rádiu rasik.
"Maibé ami mós husu nafatin ba ekipa SEKomS nia atu apoiu nafatin ami, ha'u rasik laiha koñesimentu ba komunikasaun maibé ha'u tenta hodi saida mak ha'u hatene hakarak kolabora ho entidade sira e agradese tan SEKomS bele oferese rádiu ida ne'e mai ami ida ne'e hanesan faz parte ba implemetasaun Planu Asaun Nasionál ne'ebé mak iha polítika nasionál aprova ona iha 2012 rezolusaun Governu númeru 14", hatete nia.
Maibé fundu ba kriasaun Rádiu Komunidade Defisiensia ho apoiu orsamentu hamutuk US$3,275. (*)