“Tanba ne'e husu ba benifisiária sira atu kumpri didi’ak regra ne'ebé iha ona kontratu laran, nune'e labele mosu difikuldade bainhira prosesu hotu la’o ona”, dehan Hermengildo iha Sala Auditóriu UNTL liseu, tersa (17/08).

Iha kada kausula kontratu nia ne'e, ba estudante siénsia ezata nia valór tenke 2.65 no Siénsia Sosiál valór tenke 3.0:

 “Tanba ida ne’e, prosesu ida ne'ebé atu sira bele estuda di'ak liután, tanba sira iha responsável boot ba investimentu ne'ebé estadu fó ba sira, tanba sira mak sai futuru ba nasaun ida ne'e tanba ne'e mak sira tenke utiliza didi’ak bolsa estudu ne'ebé estadu investe ba sira”, nia hatutan

Maibé ba estudante sira ne'ebé la kumpri kada kausula iha kontratu sei hapara ninia kontratu no sira sei fó fila osan estadu ne'ebé durante ne'e sira utiliza ona.

Reitór UNTL, João Soares Martins, agradese tebes ba oportunidade ida ne'e, liliu governu ne'ebé iha intensaun kria fundu hakbi’it hodi fó ba estudante sira ne'ebé mai husi família kbi’it la to’o ne'e.

“Universidade agradese tebes, tanba ho inisiativa ne'e bele ajuda hakbi’it família sira iha Timor laran tomak la'ós hothotu maibé ba sira ne'ebé priense kritéria iha kbi’it ladún to’o bele mós iha oportunidade”, dehan Reitór UNTL.

Estudante benifisiária, Petronela Boquifai, mós agradese tebes ba oportunidade ida ne'e tanba bele hakma’an ona nia prosesu estudu durante iha banku universidade

“Agradese tebes ba oportunidade ne'e, tanba ami mai husi família kbi’it la’ek, maibé ohin loron ami mós bele eskola iha universidade ne'e ho gratuita, tanba ne'e ha'u agradese tebes e iha oportunidade ida ne'e mós ami kompremetidu sei utiliza didiak oportunidade ne'e hodi estuda didi’ak nune'e bele hetan valor di'ak nafatin durante iha prosesu estudu ne’e”, afirma nia. (*)