Vise Ministru MEJD, António Guterres hatete, programa konstrusaun reabilitasaun infraestrutura Edukativu ne'e konsebidu iha programa governu hodi hatan ba Timoroan sira-nia ezizénsia no halerik iha setór edukasaun liuhusi OJE 2021.

“Atividade prinsipál husi programa ida ne'e atu konstrui no reabilitasaun instalasaun infraestrutura edukativu iha teritóriu, tanba PKRIE ne'e planu anual ba MEJD nia bá 2021 iha obrigasaun implemeta konstrusaun infraestrutura ba eskola hamutuk 221 ne'ebé hetan ona aprovasaun husi PN, tanba ne'e tinan ida ne'e sei Implementa ba eskola 169, maibé implemente uluk iha Dili, ba eskola 16”, esplika António iha salaun Edukasaun Naun Formal, Vilaverde, kuarta (11/08).

Haree ba orsamentu ministériu Edukasaun iha tinan 2021 ne'ebé tama ba fundu transferénsia públiku atu halo reabilitasaun infraestrutura edukativu ne'e hamutuk millaun US$ 20 no projetu refere sei implementa iha fulan-setembru tinan 2021.

Diretór Infraestrutura Edukasaun, Helio Lopes esplika, projetu reabilitasaun infraestrutura ba eskola 169, iha nível nasionál hahú husi pre-eskolar to’o ensinu sekundária no tékniku vokasionál.

“Maske nune'e husi númeru eskola sira ne'e maioria ba ensinu báziku iha teritóriu nasionál ne'e nia númeru boot no kondiszaun infraestrutura mós aat mak barak”, dehan nia.

Tanba ne'e, projetu reabilitasaun eskola iha nível nasionál ne'e hanesan halo reabilitasaun konstrusaun sala aula, moru, biblioteka, aumenta sala edifisiu eskola nia, no sala ba profesór sira.

Maske nune’e iha tinan 2021 husi 221 eskola ne'e MEJD tenke kumpri no kompleta sala aula hamutuk 680, ne'ebé tau ona iha OJE 2021. (*)