Kazu Soe Bebe Buras, PJR: Morál Familia Importante Featured

Prokurador Jeral da Republika ko'alia hela ba Midia sira iha Palasiu PR, Aiatrak Laran, Dili Prokurador Jeral da Republika ko'alia hela ba Midia sira iha Palasiu PR, Aiatrak Laran, Dili Foto Arkivu Midia PR

by: Isac 

Tempotimor (Dili) – Prokuradór Jerál Repúblika (PJR), José da Costa Ximenes laran-triste ho atitude joventude balun iha Kapitál Díli, ne'ebé tuir PJR lakon konsensia tanba halakon bebe lubun nia moris, hodi soe lemo iha Sidade Díli.

"Aviza ba ema hotu-hotu katak, familia mak sai xave. Tanba, sira haruka oan sira mai eskola iha ne'e (Díli) ladún iha kontrolu no livre asesu internet. Ne'e bele kontribui ba buat hirak ne'e," dehan PJR Ximenes iha Palásiu Prezidensiál Bairro-Pite, Segunda (05/08/2018). 

PJR afirma, atu buat sira ne'e menus, la'os kontrola husi regulamentu de'it. Maibé, presiza kontrolu husi familia mós. 

"Buat ida ne'ebé importante mós mak la'ós regulamentu de'it. Mas kontrolu mós husi familia, sosiedade no ita nia problema boot ida mak degradasaun morál," tenik Ximenes.

Hatán jornalista katak, hahalok ne'e demais ona? PJR dehan, to'o agora PNTL mós iha difikuldade hodi deteka arguidu ka inan ne'ebé soe bebe. Maibé, iha arguidu ida mak tribunál fó ona aprezentasaun periódika.

"Iha kazu ida mak halo aprezentasaun periódika. Restu ne'e, arguidu sira seidauk deskobre, PNTL mós hasoru difikuldade atu deskobre. Mas, kazu ida tribunál aplika fó aprezentasaun periódika," dehan PJR 

Nia subliña, ema barak haree labarik hanesan objetu. Maibé, loloos ne'e sujeitu. Tanba labarik sai vítima. "Vítima mak labarik ne'e. Ema barak haree labarik hanesan objetu. Labarik la'ós objetu. Maibé, labarik mak sujeitu husi lei. Labarik iha nia inan nia kabun laran ne'e hanesan sujeitu ona," Ximenes esplika.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.