“Prezensa Governu nian atu hakaman difikukdade ne’ebé mak enfrenta husi inan-aman, tanba ne'e lei klaru iha ne'eba. Insensaun propina ho valór ne'ebé mak US$150, nomós internet US$5, ne'ebé mak fó estudante”, dehan nia liuhusi debate kona-ba pagamentu subsídiu estudante iha plenária Parlamentu Nasionál (PN), tersa (03/08).

Tanba ne'e, MSSK hakarak informa ba deputadu katak lei númeru 8/2021, Parlamentu Nasionál aprova iha loron 3 fulan-maiu, ne’ebé define kona-ba subsídiu estudante.

Iha lei númeru 8/2021, artigu 16, iha pontu iha pontu 1 no 2 ko’alia kona-ba estudante sira ne'ebé mak rejistu iha instituisaun superior sira, atu hetan pagamentu subsídiu, valór to'o másimu US$150, siknifika estudante hothotu hetan pagamentu la liuhusi montante orsamentu refere.

Husi prosesu ne'e, estudante sira husi instituisaun Universidade Nasionál Timor Lorosa’e (UNTL) nian, sei selu tuir valór US$30 kada semestre.

Maibé ba estudante Universidade privadu sira, ne’ebé kada trimestre US$200 ne'e governu selu to'o US$150 de'it, tanba lei aprova nia másimu to'o iha US$150 no restu responsabilidade husi inan aman nian.

Enkuantu liga ba internet nian, iha artigu 17 lei númeru 8/2021, ne’ebé mak aprova iha 3 maiu, hatur klaru ona, pulsa internet ne’ebé oferese gratuita ba ensinu superior kada fulan US$10.

Maibé, Ministériu Ensinu Superior Siénsia no Kultura, nia atividade iha oin-rua, ida mak oferese pulsa internet ba estudante sira kada fulan US$10, durante fulan tolu, no atividade ida seluk mak instala internet iha instituisaun ensinu superior no privadu sira.-

Nune'e, pulsa ne’ebé mak oferese ba estudante sira, fulan ida haruka dala rua, tanba atu halo efetividade ba estudante oinsa mak bele utiliza pulsa ida ne'e ba iha nesesidade ne’ebé mak pertinente, liliu aula online nian.

Ba dadauk, akordaun refere realiza ona ho operadór hanesan Timor Telecom, Telemor no Telkomcel, ne’ebé mak realiza katak atu halo tranferénsia pulsa fulan ida US$10.

Tuir kalendáriu traferénsia pulsa ba estudante loron 15, faze dahuluk nian husi operadór Timor Telecom, hahú iha loron  27 fulan-jullu, no loron 12 to'o 26 fulan-agusto, loron 13 to'o  28 fulan-setembru, no sei remata iha loron 14 fulan-novembru.

Husi operadór Telemor nian, hahú tranfere iha loron 28 fulna-jullu, 11 to'o 26 fulan-agostu, 10 to'o 25 fulan-setembru no remata iha loron 10 fulan-outubru.

Aleinde ba operadór telkomcel nian sei hahú iha loron 28 fulan-jullu, no loron 2 to'o 16 fulan-agostu, inklui loron 1 to'o 15 fulan-setembru, no sei remata iha loron 1 fulan-outubru. (*)