Ministeiru Edukasaun Juventude no Desportu (MEJD), Armindo Maia hatete, programa estájiu pedagóziku ba formandu sira ne'ebé durante tinan tolu, tuir formasaun ba profesór ne'ebé mak MEJD hamutuk ho Universidade Nasionál Timor Lorosa’e (UNTL) fó formasaun.

“Ohin (22/07) halo abertura ba ita-nia formandu sira hamutuk 2,595 ne'ebé mak durante Tinan tolu sira tuir formasaun profesór ne'ebé Ministéir eduksaun juventude no Desportu (MEJD) ho UNTL fó formasaun iha munisípiu sira hotu nomós iha Dili”, dehan Armindo iha salaun Ian Martins, INFORDEPE, Balide, kinta (22/07).

Durante tinan tolu sira tuir formasaun teorika de’it, nune'e tama ba faze ida estájiu pedagóziku no sira sei estájiu durante fulan tolu, hodi hanorin estudante primeiru no segundu siklu iha munisípiu.

Iha fatin hanesan formandu, Daniel de Araujo, ne'ebé sei destaka iha Centru Eskola Basiku Filial (EBF) Beloi Atauro hatete, iha abertura ne'e, sira rona bainhira mak tun ba estájiu pedagójiku nomós atu koñese formandu ida-idak nia orientadór estatájiu pedagóziku nian.

“Ohin ami mai ne'e atu rona bainhira mak atu tun ba estájiu nomós ami ida-idak atu koiñese ami-nia orientadór estájiu sira, ami tun ona estájiu mak ami sei prepara planu no lori ba ami-nia orientadór ida-idak atu haree, no planu ne'e di’ak ona entaun ami lori planu ne'e ba hanorin iha eskola sira ne'eba mak ami atu ba estajiu”, dehan nia. (*)