“Purtantu, nia objetivu prinsipal ba kadernu padraun lisensiamentu ensinu superior ne'e mak atubele garante kualidade ensinu superior ne'e rasik, tuir nia objetivu ida seluk mak atubele kria liña orientasaun ka "guide line" ida atubele halo avaliasaun ba propósta lisensiamentu ba instituisaun ensinu superior sira ne'ebé mak foun, tuir lei ne'ebé mak la'o ona”, informa Ministru Ensinu Superior Siénsia no Kultura (MESSK), Longuinhos dos Santos, iha salaun Ian Martin-INFORDEPE, Matadoru, kinta (15/07).

Aleinde ne'e, objetivu prinsipál husi desiminasaun ba "kadernu padraun lisensiamentu ba ensinu superior" ne'e atu hato'o informasaun ba responsável instituisaun ensinu superior sira kona-ba regra, rekezitu no prosedimentu ne'ebé define ona.

Maske nune'e, to'o oras ne'e seidauk iha instituisaun ida mak hato'o propósta ba MESSK atu hari'i instituisaun ensinu superior foun.

Maibé, hahú iha tinan 2018 to'o 2021 ne'e, MESSK fó ona lisensiamentu Institutu Joăo Saldanha, Institu Dom Boaventura iha Betanu, Institutu Joăo de Brito Kasait, inklui mós Institutu Politeknika Betanu, ne'ebé mak hetan ona lisensiamentu, tuir kadernu padraun nian.

Entretantu, kadernu padraun lisensiamentu ba ensinu superior ne'e, hetan ona aprovasaun liuhusi despaixu ministerial númeru 90/GM-MESSK/II/202, ne'ebé mak hatuur regra atubele halo avaliasaun propósta ba lisensiamentu instituisaun ensinu superior foun sira.

“Kadernu padraun lisensiamentu ba ensinu superior ida ne'e, nia kria bazeandu rekezitu sira ne'ebé mak hatuur ona iha dekretu lei númeru 8/2010, kona-ba rejíme jurídiku ensinu superior nian nomós bazeandu diploma ministerial númeru 13/GM-ME/II/2017, kona-ba lisensiamentu ba instituisaun ensinu superior sira”, hatete nia. (*)