Prezidente Ezekutivu INCT, José Cornelio Guterres hatete, formasaun ba dosente sira atu promove koñesimentu no abilidade profisionál atu dezenvolve peskiza sientífiku no teknolojiku ho kualidade.
"Formasaun ne'e liliu hakerek proposta peskiza, e oinsá atu promove koñesimentu dosente sira-nia abilidade profisionál atu dezenvolve peskiza sientífiku no teknolojiku ho kualidade”, dehan José Cornelio Guterres, iha Salaun IAN MARTIN, Balide, segunda (05/07).
Dosente sira ne’ebé tuir formasaun mai husi universidade 18 no kada universidade haruka nia formandu na’in-rua hodi tuir formasaun refere.
Formasaun ne'e liga liuba área abilidade hakerek proposta peskiza, no formasaun ne’e fahe ba parte tolu, metodolojia peskiza, hakerek proposta peskiza no oinsá abilidade hakerek artigu ida ho di'ak
Iha fatin hanesan, dosente partisipante husi Universidade Dili (UNDIL), Atanasio Belo hatete, formasaun ne’e di'ak tebes no oportunidade di'ak ida ba dosente sira, hodi bele hasa’e koñesimentu kona-ba metodolojia peskiza no oinsá bele deskobre fenómenu natureza husi peskiza ne'e rasik.
"Ba ensinu superior sira tenke aproveita oportunidade ida hanesan ne'e ho di'ak, tanba peskiza sira hanesan ne'e ita la hetan iha fatifatin, nune'e ami agradese bele hetan oportunidade di'ak ida ne'e”, afirma nia.
Maibé rekomenda ba INCT atu formasaun hanesan ba dosente sira, presiza iha nia feedback nune'e dosente sira bele iha esperitu (semangat) ba peskiza.
Formasaun refere ho duransaun sei hala’o durante loron lima (5) hahú husi loron 5 fulan-Jullu to’o loron 9 fulan-Jullu tinan 2021. (*)