Tempotimor (Díli)-Governu liuhusi Ministériu Edukasaun Juventude no Desportu (MEJD) no Ministériu Ensinu Superior no Siénsia (MESS) sei hein Profesór maioria simu vasina hafoin reativa filafali eskola.

Ministru Prezidénsia Konsellu Ministru (MPKM), Fidélis Leite Magalhães hatete, governu sei hein profesór sira simu Vasina hafoin bele hahú prosesu aprendizajen direta.

"Fim husi Komfinamentu Obrigatóriu iha Munisípiu  Díli la implika katak eskola sei reativa automátikamente tanba Ministru Edukasaun no Ministru Ensinu superior presiza atu asegura seguransa labarik sira-nian hodi nune'e sira sei asegura katak maioria ou professór sira hotu hetan tiha ona Vasina antes filafali ba hanorin”, dehan Fidélis iha Aitarak Laran, kuarta (16/06).

Tanba ne’e, kontrola sukat entre númeru Profesór sira no pesoál sira ne'ebé serbisu iha administrasaun eskola nian atubele hetan Vasina hafoin normaliza.

“Tuir medida sira situasaun Estadu Emerjénsia ne'e dehan desizaun sira kona-ba eskola ne'e sei halo tuir diploma Ministerial relevante ne'ebé Ministru Edukasaun no Ministru Ensinu Superior hafoin haree situasaun mak liuhusi diploma Ministerial mak sei deside”, afirma nia.

Relasaun mós ho númeru inan aman sira-nian atu hetan tiha Vasina, tanba ida ne'e apela ba inan aman sira atubele hetan Vasina lalais nune'e oan sira bele filafali ba eskola ho normál. (*)