Print this page

Vasina Ajuda UNTL Reativa Aula Prezensiál

Tempotimor (Dili)-Reitór Universidade Nasionál Timor Lorosa'e (UNTL), João Soares Martins hatete, vasina ne’ebé durante ne’e aplika hodi halo prevensaun ba moras Covid-19, bele ajuda UNTL atu reativa aula prezensiál.

Tanba surtu Covid-19 ne’e konsege happara atividade hothotu iha rai laran inklui atividade eskola ninia, maibé ho vasina AstraZeneca no Sinovac ne’ebé apoiu husi parseiru sira bele fasilita ona hodi hasa’e imunidade sidadaun hotu hasoru moras refere.

“Ami tenta atu rekopera ho fasilidade online, mais ita la bele konfia ba timortelekom, telekomcel ho telemor sira sai la amor hotu tanba nunka ajuda ita, ho oportunidade ida ne'e, ami agradese tebtebes ho vasinasaun ida ne'e, atubele hahú filafali aula prezensiál ne'ebé mak profesór sira, estudante sira hein filafali ba normalidade”, dehan Reitór iha seremonia lansamentu vasina Sinovac ba estudante, profesór no komunidade Xineza iha kampus sentrál UNTL, segunda (14/06).

Haree ba situasaun ida ne'e perigu tebtebes no la bele kontinua situasaun hanesan ne'e, tanba afeita ba futuru nasaun nian, liga ho kualidade formasaun.

“Sira envez sai formadu ne'ebé bem formadu, maibé sira sai de'it formadu online, entaun ida ne'e sei la ajuda ita. Ita kontente mundu dejitalizadu ita presiza apoiu husi fasilidades hotu inklui ensinu distánsia atravéz modalidade online, maibé ema realidade iha Timor, ita la bele tau esparasa maka’as liu, tanba ita-nia kompaña telekomunikasaun la bele fasilita ita hala'o ita-nia servisu”, afirma Reitór.

Ho ida ne’e, estudante, profesór sira bele hakat ba sentru vasina, atu hahú atividade aprendizazem husi ensinu báziku, sekundaria to'o universidade.

Entretantu, Ministru Ensinu Superior Siénsia no Kultura (MESSK), Loguinhos dos Santos hatutan, kampaña vasinasaun ne’e importante ba komunidade akademika sira liuliu ba profesór, estudante, funsionáriu sira husi instituisaun públiku no privadu sira inklui mós komunidade Xineza iha munisípiu Dili ho vasina Sinovac.

“Ita hotu hatene katak, atividade eskola iha nível hothotu, iha nível superior sira hetan suspende, tanba hetan propagasaun ne'ebé maka’as husi Covid-19 ho razaun ida ne'e mak ohin ita hahú kampaña vasinasaun”, dehan nia.

Kampaña vasinasaun ida ne'e importante ba komunidade akademika sira, atu bele proteze-an no liuliu ba komunidade sira-nia moris tanba atu konkretiza objetivu ida ne'e, presiza servisu hamutuk hodi asegura maioria mai husi dosente rihun-67, estudante no funsionáriu sira tomak, atubele asegura ativamente ba kampaña no tuir prosesu vasinasaun ida ne'e ho kompletu.

“Ha'u apela ba dosente sira, estudante sira no funsionáriu sira, husi instituisaun superior sira katak la bele tauk atu tuir vasina no uza oportunidade ida ne'e atu proteze imi-nia saúde no ba família tomak hodi kontribui ba pais ida ne'e”, afirma Ministru.

Vasina Sinovac ne'e servisu hamutuk entre Ministériu Ensinu Superior Siénsia no Kultura, Ministériu Saúde hodi define postu ne'ebé mak atu establese iha Munisípiu Dili hanesan UNTL, IOB, DIT, Sekretáriu Estadu Desportu nomós Asosiasaun Xineza. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items