Bolsu estudu refre liuhusi akordu ne’ebé asina entre Reitór UNTL, João Soares Martins ho Prezidente RTTL,ep, José Antonio Belo, iha Salaun INFORDEPE, tersa (25/05), atu haberan kapasidade iha área oioin hodi bele profisionaliza liután instituisaun RTTL nian.
“Ami la fokus de'it ba área ida jornalízmu, mais jornalízmu iha agrikultura, edukasaun, saúde no buat ne'ebé mak iha UNTL ne'e, ami hakarak husu hetan oportunidade ida, previléziu ida husi UNTL, oferese espasu ba ami-nia jornalístas, tanba ami iha 197, que balun graduadu ona husi universidade, mais balun seidauk mak liuhusi dalan UNTL ninian”, dehan Prezidente RTTL, EP, José António Belo iha salaun INFORDEPE Matadoru, tersa (25/05).
Aliende ne’e, RTTL mós sei ajuda habelar informasaun sira kona-ba atividade akadémika no peskiza nian ne’ebé durante ne’e la’o iha Universidade refere.
"RTTL oferese espasu ba UNTL, liliu ba dosente sira, dekanu sira, fakuldade hothotu ne'ebé iha UNTL, liuhusi akordu ida ne'e, hodi bele hatete katak “RTTL go to Campos”. Entaun, RTTL sei prezensa iha kampus hodi bele fasilita sivitas akadémiku sira hodi bele halo diskusaun ka debate akadémiku kona-ba saida mak ema inteletuál sira-nia kontribuisaun ba dezenvolvimentu pais ninian”, dehan nia.
Iha fatin hanesan, Reitór UNTL, João Soares Martins hatete, foin ba dala-uluk UNTL halo kooperasaun ho RTTL, no sente kontente tanba RTTL halo kobertura barak kuaze iha territóriu laran tomak, ba mós estranjeiru.
“Entaun, ida ne'e momentu oportunu ida para ita atubele servisu hamutuk entre RTTL ho UNTL. Sé servisu di'ak liután, RTTL bele ajuda habelar atividade akadémika, peskiza, servisu komunitária ne'ebé mak hala'o iha universidade, nomós iha territóriu tomak”, dehan Reitór UNTL.
Bainhira husu kona-ba, akordu bolsu ba jornalísta sira, maibé sira sei diskute hamutuk atu haree ba opsaun ida ne'e.
"Mais no-entantu halo diskusaun formál, e ha'u dehan ba Prezidente RTTL katak, iha UNTL iha kursu komunikasaun sosial, jornalista sira bele mós”, dehan nia.
Maske nune'e, univeraidade tenke estuda modalidade atu tama ne'e oinsá, tanba presiza halo diskusaun naruk, aprova iha konsellu Jerál UNTL nian, nomós aprovasaun husi ministériu ensinu superior.
"Mas ba ami odamatan nakloke, ita bele hahú kooperasaun atu bele hakat ba iha ne'e”, dehan nia. (*)
