"Ha'u hakarak hato'o dala-ida tan katak, serimónia ne'e hanesa graduasaun dahuluk ba estudante sira ne'ebé mak hala'o liuhusi sitema online, tanba limitasaun hirak ne'ebé mak sai hanesan kauza husi pandemia covid-19 ne'ebé timor-leste no mundu, hasoru hela dadaun ne'e”, dehan Ministru Ensinu Superior Siénsia no Kultura (MESSK), Longuinhos dos Santos iha graduasaun virtual UNTL nian iha salaun UNFORDEPE Matadoru, tersa (25/05).
Graduasaun UNTL ba ba dala-24, mak Ministru fó parabéns ba graduadu sira, no agradese ba dosente, estrutura UNTL nian tomak tanba hetan solusaun alternativa ida ne'e hodi realiza serimónia graduasaun ba estudante finalista sira husi tinan 2021 ne'e.
Entretantu Reitór UNTL, João Soares Martins, husu ba estudante sira atu nafatin estuda no tempu ona atu buka emprégu ba-an rasik hodi servi komunidade no nasaun.
"Mensajen, loron ohin ne'e loron sira-nian. Loron para sira atu kontente, loron sira-nia susesu, sira merese duni atu selebra sira-nia loron ida importante atu haksolok iha loron ida ne'e, maibé keta haluha estuda nafatin”, afirma Reitór.
Entretantu Guaduada husi Fakuldade Medísina Siénsia Saúde, Nívia de Pina Sarmento, agradesimentu boot ba estrutura sira tomak UNTL nian, tanba dedika ona sira to'o termina estudu husi banku Universidade.
“Susesu ida ne'e, la'òs ami mesak, maibé frutu importante husi imi dosente sira hotu no loron ida ne'e mak ami hein duni durante tempu naruk nia laran, e ami agradese tebes ba apoiu dedikasaun morál husi família sira hotu nian, espesila ba ami nia inan aman sira”, hatete nia.
Graduadu hamutuk 251 ne'ebé tuir graduasaun virtual ne'e, mai husi fakuldade Medisína Siénsia no Saúde, Ekonómia ho Jestaun, Siénsia Sosiál, Enjeñéria Siénsia no Teknolójia, Edukasaun Arte no Umanidade. (*)