UNTL Entrega Uma ba Familia Moras Lepra Featured

Dosentes ho estudantes sira atende hela seremonia bencaun ba uma ne'ebe entrega ba maluk moras Lepra Dosentes ho estudantes sira atende hela seremonia bencaun ba uma ne'ebe entrega ba maluk moras Lepra Foto Suplai

Tempotimor (Dili) - Univesidade Nasional Timor Lorosa'e (UNTL) entrega uma ba familia kbiit laek ne'ebé durante ne'e sofre moras lepra.

Iha Sesta (21/06), ofisialmente UNTL entrega xave uma ne'ebé konstrui iha area Has Laran, Bekora ba Agustinha Pereira ho nia oan na'in 10.

“Ohin iha seremonia entrega uma ne'ebé mak konstrui husi Universidade Nasional Timor Lorosa'e (UNTL) ba señora Agustinha Pereira ho nia familia. Señora Agustinha ho nia familia nu'udar kibit laek no mós hetan moras lepra”, dehan Pro-reitór asuntu Akadémiku UNTL Miguel Maia iha salaun Kanosiana, Has Laran, Bekora.

Pro-reitór ne'e dehan konstrusaun uma ba kibiit laek ne'e hetan apoiu husi duador lubun ida liu husi UNTL.

Uma ne'e rasik konstrui husi estudante Fakuldade Engenaria, Siénsia no Teknolójia (FECT) ho voluntariamente. Konstrusaun uma ne'e la'o durante fulan lima nia laran.

"Estudante sira halo konstrusaun iha de'it loron Sábadu no Domingu. Ikus mai konsege finaliza uma ne'e, no ohin entrega ofesialmente ba familia kbiit laek ne'e."

“Orsamentu ne'ebé UNTL uza hodi konstrui ba uma ne'e kuaze dolares amerikanu rihun $10,” Miguel informa.

Iha fatin hanesan Agustinha Pereira nu'udar benefisiaria sente kontente tanba estudante UNTL sira ho voluntariu kontrui hela-fatin ba nia ho familia.

“Sente kontente tebes tanba durante ne'e ami mós sente diferensia uitoan, maibé agora estudante sira halo sira-nia knar mós di'ak tebes. Ida ne'e ba ami hanesan familia kbiit laek sira, ami sente kontente tebes tanba sira halo mahon ida ba ami, ” Agustinha espresa.

Agostinha durante ne'e hela iha uma ho kondisaun ne'ebé ladun di'ak hamutuk ho nia oan nai 10. Familia ne'e sofre mós moras lepra.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com