Molok tuun ba hala'o estajiu, estudante hirak ne'e hetan briefing husi dosente sira durante loron rua nia laran.

“Baibain estudante sira (molok) tuun ba fatin estájiu ami briefing durante loron rua hodi fó hatene ba estudante sira kona-ba lalaok no prosediementus, liu-liu étika komunikasaun estudante nian iha fatin estájiu, liu-liu iha komunidade nia leet,” dehan Vise Dekanu FCS asuntu Estudantil Bernardo Idalina Leto, iha FCS, kuarta (19/06/2019)

Vise Dekanu ne'e dehan, instrusaun importante ne'ebé parte Universidade fó ba estudante sira mak labele mete artemarsiais no labele hemu tua iha fatin estájiu.

“Instrusaun ne'ebé ami fó ba estudante sira mak kona-ba étika komunikasaun iha fatin estájiu hanesan labele mete artemarsiais, labele hemu tua iha fatin estájiu,” dehan nia.

Bernardo dehan politika UNTL nian atu eleva kualidade estudante mak molok remata estudu, estudante sira tenke ba estájiu tuir idaidak nia area estudu.

Liu husi estájiu, nia dehan, estudante finalista sira sei iha biban atu aplika siénsia ka teoria hirak ne'ebé sira hetan durante sira hala'o estudu.

“Estudante husi departementu Administrasaun Públika ne'ebé ami sei koloka ba munsipiu rua ne'e, liu-liu ba suku sira hodi oinsa mak sira serbisu hamutuk, dezenvolve sistema administrasaun iha suku."

Iha fatin hanesan, estudante finalista ida, Filomena Paixão da Cruz dehan durante iha prosesu briefing dosente sira fó instrusaun oinsa mak bele aplika teoria ne'ebé durante ne'e hetan ona iha banku universidade.

“Ami Fakuldade Siensia Sosial nia laboratóriu mak komunidade, katak oinsa ami hatene sira-nia moris iha área rural”, dehan estudante ne'e.

Filomena promete, liu husi estajiu ne'e sei esforsu an atu ajuda no apoiu autoridade lokal sira hodi hadi'a sistema administrasaun iha suku ne'ebé nia hala'o estajiu ba.

“Esperansa ne'ebé ami iha, mak iha ne'ebá ami hakarak hadi'a kona-ba atendimentu no sistema administrasaun nian iha sede suku sira. Tanba iha ne'ebá bainhira ami halo estudu dirijidu ba suku sira iha kapitál Dili mós ami hetan problema sira hanesan ne'e. entaun ami hakarak muda buat ne'ebé mak sei falla hela, atu nunee bele aselera serbisu administrasun iha suku nian," dehan finalista ne'e.