Funsionariu na'in-93 iha MEJD daudaun seidauk asina kontratu servisu, tanba mosu irregularidade barak iha prosesu rekrutamentu.
"Ha'u informa ba Primeiru Ministru kona-ba ajente administrasaun públika 93 ne'ebé tinan kotuk iha 2019 hala'o prosesu rekrutamentu, maibé depois ami haree, verifika fila-fali, ami haree katak akontese irregularidade lubuk ida, entaun ami agora elabora hela projetu rezolusaun ida atu mai fali iha Konsellu Ministru para atu foti desizaun," dehan nia hafoin sorumutu ho Primeiru Ministru Taur Matan Ruak, iha Palàsiu Governu, segunda (08/02/21).
Nia fó-sai katak, hafoin halo verifikasaun ba dadus deskobre iregularidade barak tebes.
Tanba, prosesu rekrutamentu ne'e la'ós mandatu MEJD Armindo Maia nian, entaun tenke lori mai Konsellu Ministru para deside.
"Buat ne'e la'ós hala'o iha ami-nia tempu, iha governante uluk ninia tempu, entaun prontu ami sente katak, ida-ne'e tenke lori mai Konsellu Ministru atu desidi iha-ne'e," nia afirma.
Antes ne'e, Dulce de Jesus nu'udár Ministra Edukasaun Juventude no Desportu (MEJD) hasai tiha funsionáriu hamutuk na'in-93, maibé ikus fali mai sira hirak ne'e tuir fali teste husi Komisaun Funsaun Públiku hodi sai fali funsionariu iha MEJD, maibé to'o oras ne'e seidauk asina kontratu servisu, tanba deskonfia mosu irregularidade. (*)
