Nia dehan, husi programa prioridade hamutuk 9 ne'e maka hanesan, halo reforma ba jestaun, fortalesimentu ba misaun Universidade nian, ensinu, peskiza no servisu komunitária, Reforsa Servisu Nasionál Investigasaun Sientífika (SNIC) iha UNTL rasik.
Nia hatutan, programa seluk tan mak kona-ba sentru formasaun avansada, hadi'a rekursu umanu, Infraestrutura ba auditóriu, laboratóriu no biblioteka, kooperasaun nasionál, rejionál no internasionál, apoia ba asosiasaun estudantíl sira no inklui haree "bén estár" sivítas akadémika UNTLnian tomak.
"Ami iha prioridade 9 ne'e maka importante para atu-bele lori UNTL ba oin", dehan Reitór UNTL, Joăo Soares Martins ba jornalísta sira hafoin ofisialmente simu pose reitór eleitu iha Kampus Fakuldade Enjeñeria, suku Hera, Postu administrativu Cristo Rei, Munisípiu Dili, sesta (29/01).
Nia dehan, iha parte jestaun nian, presiza halo reforma inklui haforsa mós sentru formasaun avansada sira tanba sira-nia papél mak atu bele halo servisu ida di'ak liu tan hodi produz rezultadu ne'ebé mak di'ak.
"Hadi'a rekursus umanus para kualifikadu liután, rekursu internu, rekursu profesór sira tenke di'ak, pesoál administrativu sira tenke di'ak, ne'e mak importante, presiza tenke hadi'a mós infraestrutura para atubele mós halo viavel iha auditoriu, laboratóriu, biblioteka, sasán sira-ne'ebé mak atubele ajuda prosesu aprendijazen," tenik nia.(*)