Print this page

PN Ejize Hapara Prátika Orientasaun "Ala Indonézia" ba Estudante Foun

By January 20, 2021 3398

Tempotimor (Dili)-Membru Parlamentu Nasionál (PN) husi bankada Partidu Libertasaun Popular (PLP) Abel Pires, ejize Ministériu Edukasaun Juventude no Desportu (MEJD) tenke halo intervensaun hodi hapara prátika orientasaun ho violénsia ba estudante foun.

Deputadu PLP ne'e haktuir, iha semana hirak liu ba ema balun hahú publika video balun, estudante tuan sira fó orientasaun ba estudante foun.

''Tinan ba tinan violénsia iha eskola ne'e akontese beibeik, ne'ebé hanesan prátika ida-ne'ebé ke ita simu, normalidade foun ida ke ita simu, ha'u lahatene tanba saida, iha semana oin atividade orientasaun ne'e komesa ona. Ha'u lakohi estudante timor oan hotu, liuliu ita-nia oan no subriñu sira, atu hetan violénsia husi sira-nia kolega ne'ebé eskola uluk, iha eskola sekundáriu sira, iha universidade sira, ne'e tenke para, tanba ne'e prátika ne'ebé laloos,'' deputadu Abel hato'o lamentasaun ne'e iha plenária, Parlamentu Nasionál tersa (19/1).

Nia haktuir, oras ne'e daudaun Timor-Leste presiza atu prepara jerasaun foun sira oinsá atu tur iha parlamentu, no órgaun estadu sira hotu, maibé molok sira atu sai líder lori timor ne'e ba oin, entaun governante sira tenke prepara sira husi zero, sé kuandu sira iha eskola mak sira aprende violénsia depois estadu nonok husik ida-ne'e la'o ba oin, entaun estudante sira-nia pensamentu nakonu de'it ho violénsia.

Nia konsidera buat ida problema violasaun kona-ba atividade orientasaun iha eskola no universidade sira, iha Timor-Leste, ida-ne'e nu'udar prátika ne'ebé Indonézia sira uza iha tempu uluk, no agora Indonézia rasik mós la uza ona orientasaun sira hanesan ne'e, maibé Timor-Leste kontinua uza prátika ida-ne'e.

''Ha'u iha esperiénsia, eskola eskola iha Timor, iha Indonézia ho Austrália ne'e diferénsa ne'e dook tebe-tebes. Agora Timor-Leste uza fali prátika ida ke indonézia ne'e dook ona, la uza kleur ona,'' nia konta tuir.

Hatán ba kestaun ne'e, Ministru Asuntu Parlamentár no Komunikasaun Sosiál (MAPKOMS) Francisco Martins Jerónimo deklara, problema ne'e'bé deputadu sira levanta sei enkamiña ba ministériu relavante atu-bele tau matan no rezolve.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items