Durante debate espesialidade proposta Orsamentu Jerál Estadu (OJE) 2021 Armindo Maia rekoñese katak, problema profesór kontratadu la’ós buat foun iha kualkér mandatu iha kargu MEJD nian.
Armindo akresenta, totál professores kontratadu hamutuk na’in 523 bainhira liu husi verifikasaun dadus ne'ebé hahú kedas iha tinan 2013, nune'e Armindo konsidera hanesan naha todan ida ba MEJD atu leva no sei buka solusaun ba kestaun ne’e.
"Tanba númeru ne'e barak no nia implikasaun ne'ebé bo'ot kuandu sira atu sai professor permanente, ami tenki konsulta ho funsaun publika, ministeiru finansas ne'ebé obiamente konsellu ministru mós sei involve atu bele foti desizaun. Ne'ebé 2021 ami sei buka solusaun ruma, se la konsege sira ne'e dala-ida, prontu tenki fazeadamente," Armindo Maia hateten hateten iha PN, Kinta (10/12).
Governante ne'e mós akresenta, iha tinan 2021, MEJD sei planeia atu rekruta tan professores hamutuk na’in 975.
Antes ne'e, liu husi intervensaun maioria deputadu sira husu estatutu professores kontratadu ba permanente, reprejentante povu sira iha PN husu atu governu liuhusi MEJD buka dalan atu rezolve lalais problema ne’e.(*)
