Iha serimónia kari ai-funan ne'e, PR Lú-Olo dehan, hamutuk ho kometiva reza ba saudozu sira ne'ebé durante ne'e sakrifika sira-nia aan ba rai doben Timor-Leste.

"Ohin Prezidénsia Repúblika, mai hamutuk ho ha'u no kometiva, mai reza ba ita-nia matebian sira hotu ne'ebé simu sakrifísiu boot iha ai-laran hodi to'o sira-nia restus morais mai tau iha fatin ida ne'e," dehan Xefe Estadu Francisco Guterres Lú-Olo iha Jardim ba eroi sira iha Metinaru, Segunda (2/11).

PR Lú-Olo mós afirma, loron ohin nu'udar loron importante ba povu Timor-Leste, tanba reza no vizita matebian sira-nia rate.

"Loron importante ba povu Timor tomak, ne'ebé sira ida-idak fila ba sira-nia fatin hodi ba vizita sira-nia familia ne'ebé mate ona nia rate, entaun orasaun ne'ebé ami reza iha ne'e, ami ho sentimentu nafatin hamutuk ho familia tomak husi Tutuala to'o Fronteira husi Atauro no Oekusse, ami reza hamutuk ho familia sira tomak," dehan PR Lú-Olo.

Aman ba nasaun ne'e mós dehan, loron ohin ne'e nu'udar loron memória ba familia sira atu vizita matebian sira iha Timor-Leste.

Iha loron finadu ne'ebé PR Lú-Olo ba vizita saudozu sira-nia rate iha Jardim ba eroi sira iha Metinaru, PR Lú-Olo no Espoza mós hasoru malu ho Eis PR Ramos Horta iha rate Prokuradór RDTL nian.

Entretantu observasaun www.tempotimor.com nian iha terenu katak bainhira Xefe Estadu ho espoza no kometiva ba atu vizita saudozu sira-nia rate, PR ho espoza no kometiva tau uluk ai-funan no reza iha kruz inan, depois mak ba vizita rate saudozu sira nian inklui Proklamador ba Independénsia Timor-Leste, 28 de Novembro 1975, Francisco Xavier do Amaral nia rate.

Hafoin vizita Proklamador RDTL nia rate, PR Lú-Olo ho espoza kontinua halo vizita ba saudozu sira seluk nia rate hanesan, rate saudozu Nino Konis Santana, audoza Clotilde Maria de Fátima (Lou Tik), Carlos Cesár Correia Lebre (Mau-Laka), Hermenegildo Augusto Perreira Alves, Alfreido Cabral (Selok) Bendito Belo (Mauselou), Afonso Henrique Monteiro (Kalowai), Abel Kabral (Loki), Virgílio Freitas (Kalisa/Kmanek), Fernando Nunes (Rankabian), Rosito Ximenes Belo, Fernando da Silva S. da Resureição, Virgílio dos Anjos (Ular Rihik), Fernando de Araújo (Lasama) no José da Silva Painão (Floran/La'o Rai).(*)