Print this page

PR Lú-Olo Komprometidu Sai Promotór ba Dezenvolvimentu Kultura TL Featured

By October 26, 2020 1430

Tempotimor (Dili)-Atu dezenvolve kultura Timor-Leste nian husi múziku no dansa kulturál, mak Prezidente Repúblika (PR) Francisco Guterres Lú-Olo komprometidu hodi sai promotór ba dezenvolvimentu kultura iha Timor-Leste.

Tuir Xefe Kaza Sivíl (XKS) Palásiu Prezidensiál Francisco Maria de Vasconcelhos katak, kona-ba dezenvolvimentu kultura iha TL, PR Lú-Olo komprometidu ona atu sai protetór hodi dezenvolve.

"PR Lú-Olo komprometidu ona atu atu halo promosaun no hametin ita-nia kultura, tanba kultura buat ida ne'ebé dinámiku la'ós estétiku, só adat mak estétiku, maibé ema barak dehan, kultura mak adat ka adat mak kultura, maibé loloos ne'e adat ne'e parte ida husi kultura," dehan Vasconcelhos iha abertura ba Festivál Nasionál Arte no Kultura iha edifísiu SEAK Pantai-Kelapa, Dili, Segunda (26/10).

Xefe kaza sivíl ne'e afirma, iha kompetisaun ne'e atu hatudu kapasidade kompetitór sira nian, liuhusi valór kulturál TL nian.

"Valór kulturál ne'e mak buat importante ida ne'ebé dezenvolve ita-nia estadu ba oin, tempu barak ita halo dezenvolvimentu ba infraestrutura nian, maibé valór kulturál nian ita ladun tau importánsia, tanba ne'e mak PR hola inisiativa hodi promove ita-nia valór kulturál liuhusi kompetisaun ne'e," nia dehan.

Iha fatin hanesan, Sekretáriu Estadu Arte no Kultura (SEAK) Teofilho Caldas katak, PR hakarak dignifika eroi sira liuhusi promove talentu joven nian ho múziku rezisténsia.

"Xefe estadu hakarak dignifika no valoriza eroi sira hotu, liu-liu eroi sira ne'ebé kontribui ba luta libertasaun nasaun nian liuhusi múziku ka poezia sira," dehan SEAK.

Promove kultura Timor-Leste nian ne'e iha komepetisaun modelu rua mak hanesan múziku ho kontestante hamutuk na'in 127 no kontestante seluk ho forma grupu ne'ebé sei reprezenta munisípiu sira inklui RAEOA.

Entretantu programa Prezidente Repúblika nian ne'e atu komemora ba loron Restaurasaun ba Independénsia Timor-Leste nian iha fulan oin.(*)

Rate this item
(0 votes)
Last modified on Monday, 26 October 2020 17:16
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items