Portavoz Alumni UNPAZ Max Maubere hatete, universidade ida sei monu bainhira ema ne’ebé lidera laiha kapasidade.
"Hanesan reitór atuál UNPAZ señor Adolmando Amaral ne'e la merese lidera UNPAZ, tanba ne'e ami sei halo nia sees de'it, nia atu rezigna an ka asosiasaun mak atu hasai tiha nia ka oinsa, mais ida ne'e mak nia konsekuénsia, tanba nia la marese lidera UNPAZ," deklara nia hafoin halo diskusaun ho Reitór UNPAZ, Sesta (16/10).
Hatan ba ezijénsia ne'e, Reitór UNPAZ mós dehan, iha instituisaun ida hatun ka hasa'e ne'e normál, maibé tenke tuir dalan legál.
"Ha'u bele tuun husi kargu reitór, maibé tenke hatudu evidénsia ne'ebé forte, tanba ha'u mai ne'e liu husi prosesu demokrátiku ida, se ema sira ne'ebé iha momentu ne'eba apoiu ha'u mak hakarak ha'u tuun, ok, ha'u prontu, mais alumni barak apoiu ha'u depois alumni uitoan mak mai ejize, ha'u labele rona sira," dehan nia.
Nia hatete, nu’udar reitor nia labele atu rona ema uitoan nia lian, tanba nia tenke fó importánsia ba universidade, funsionáriu sira, dosente no estudante sira, duke rona ba ezijénsia husi alumni uitoan.
Maske nune'e, alumni sira mós promete katak sei mantein iha resintu universidade nian to'o reitór tuun husi nia kargu. Maibé ba kestaun ne'e reitór afirma, bainhira iha impedimentu ba prosesu aprendisajem, maka reitór sei husu parte seguransa halo kapturasaun ba sira.
"Ohin diskusaun ona no rona ona sira nia ezijénsia, tanba ne'e sei hasoru malu iha loron 24 semana oin, entaun sira labele halo tan ona, maibé se sira halo nafatin, maka tenke husu seguransa halo kapturasaun, tanba halo impedimentu ba estudante seluk nia prosesu aprendisajem," katak Reitór.