Tempotimor (Letefoho)-Komunidade suku Katrai Kraik ne'ebé lokaliza iha foho Ramelau hun, simu eis komandante ein xefe das FALINTIL, Kay Rala Xanana Gusmão no eis Prezidente Repúblika Dr. Jose Ramos Horta ho bidu no kustume tuir suku Katrai Karaik nian.

Vizita ne'ebé lider karismátiku halo ba suku Katrai Karaik ne'e, atu halo asaun kariedade no esplika moras Pandemia Covid-19 ba komunidade sira.

Iha vizita ne'e, halo kumunidade sira haksolok no antusiazmu simu lider nasionál na'in rua ne'e.

Hafoin Kay Rala Xanana Gusmão to'o iha komunidade nia leet, xefe suku Katrai Kraik Carlos da Conceição Soares katak, atu halo karitativa.

"Tuir ami hatene katak vizita ne'e liga liu ba virus corona ne'ebé mak akontese no halo asaun karitativu nian mai komunidade sira suku tolu hanesan Katrai Karaik, Katrai Leten inklui suku Lauhana, para hasoru direta ferik, katuas sira iha suku tolu ne'e," katak xefe suku ne'e ba www.tempotimor.com iha Katrai Karaik, Sesta (18/9).

Lideransa ba suku ne'e mós lori komunidade nia naran sente kontente, tanba ba dahuluk komandante ein xefe Kayrala Xanana Gusmão no Eis Prezidente Repúblika Ramos Horta mai vizita suku ne'e.

Entretantu vizita lider na'in rua ne'e simu direta husi lia-na'in sira, komunidade, estudante husi primária to'o sekundária.